Kou Siprèm Etazini ap konsidere yon nouvo pwosè ki gen pou wè ak dilatasyon ki afekte fi toupatou Ozetazini.
Opozan dwa medam yo genyen pou jete pitit vle pou Kou Siprèm nan ratifye desizyon yon kou dapèl federal konsèvatè te pran ki ta limite aksè ak yon medikaman ki rele mife-pristone - ke yo te sèvi nan 2/3 ka dilatasyon ane pase a.
Pwosè a ap dewoule 2 zan apre Kou Siprèm nan te ranvèse desizyon Roe v Wade la, ki te pèmèt plizyè eta Repibliken ap dirije enpoze restriksyon sevè sou dwa fi genyen pou jete pitit.
Manifestan pwo ak anti dilatasyon rasanble devan Kou Siprèm nan pou eksprime opinyon yo.
Bethany Van Kampen Saravia vle di Kou Siprèm nan medikaman mife-pristone nan su.
" Ka sa a se bon jan blof. Medikaman an su e moun ap itilize l depi dè dizèn ane. Enplikasyon pwosè sa a pata ka pi ekstrèm epi rive lwen. Kèlkeswa sa jij yo di, kèlkeswa sa tribinal yo di moun pral toujou jwen mwayen achte medikaman pou jete pitit. Moun kapab fè dilatasyon andeyo sistem swen sante ofisyèl la yon fason ki si. Fi ki jere dilatasyon poukont yo kapab fe l an sekirite. Dilatasyon ak pilil su. Moun ka resevwa swen ak diyite kelkeswa sa tribinal la di jodia."
Savanna Dereitch limenm se manm gwoup Etidyan pou Aksyon Lavi. Li kwè mife-pristone koze domaj pou sante fanm ak timoun.
"Mwen lw jodia paske fok nou sispann vann medikaman pou fè dilatasyon an liy kap blese non sèlman fi men timoun. Yo domaje dlo nap bwè a, afekte anvironman nou ak ekosistem nou an jeneral. Fok nou re-mete sofgad an plas epi jere yon pratik ki non sèlman touye fanm men timoun nou tou."
Kou Siprèm nan gen pou pwononse desizyon li nan fen mwad Jyen an.
