Kanada ak Repiblik Dominikèn antann yo pou Kanada kowodone asistans pou Ayiti. Antan ant 2 peyi yo mande ou Kanada ogmante kantite anplwaye li genyen nan anbasad li yo nan Potoprens ak Santo Domingo, dapre yon deklarasyon konjwen ki pibliye Mèkredi.
Antant sa a rezoud yon mezantant piblik ki te genyen semèn pase a sou kestyon yon biwo Kanada te pwopoze pou l tabli sou teritwa Dominiken, e ki te riske konplike pi plis plan entènasyonal ki egziste pou apiye fos polis nasyonal Ayiti a.
Dapre deklarasyon konjwen an: "Kanada ak Repiblik Dominikèn gen relasyon bilateral solid e yo patnè depi lontan sou kestyon ki gen pou wè ak sekirite rejyon an."
2 peyi yo dako ke kriz Ayiti a mande kowoperayson entènasyonal pèfeksyone, ansanm ak asistans imanitè ak sekiritè, dapre deklarasyon an.
Peyi yo di yo pwal "amelyore kowodonasyon yo an Ayiti, Repiblik Dominikèn ak Kanada ansanm ak lot zon ki nesesè. Yo gen entansyon ogmante prezans yo nan anbasad Kanada nan Potoprens ak Sen Domeng tou" dapre deklarasyon an.
Semèn pase a, Minis Afè Etranje Kanadyen Melanie Joly te anonse plan pou tabli yon biwo pou kowodone asistans pou Ayiti nan peyi vwazen Repiblik Dominikèn. Yon jou apre, tokay Dominiken li, Roberto Alvarez te deklare pa gen okenn antant ki egziste pou otorize yon bagay konsa.
Gen anpil tansyon ant Repiblik Dominikèn ak Ayiti kounyea. Depi zak vyolans gang yo ogmante ane pase a, Sen Domeng ogmante sekirite li sou fwontyè a epi depote plizyè dizèn milye Ayisyen kap kouri kite kay yo akoz ensekirite a.
Ane pase a, Premye Minis Ariel Henry te mande pou yon fos entèvansyon entènasyonal vinn ede Ayiti kwape gang yo. Kounyea gang yo kontwole gwo posyon teritwa nasyonal la -- e sa vinn deklanche yon kriz imanitè ki fose plizyè milye moun kouri kite kay yo.
Etazini ankouraje Kanada jwen yon wol lidè nan jefo a, men jiskaprezan okenn peyi poko ofri pou l dirije fos entènasyonal la.
