Denyè nouvèl konsènan ankèt k ap fèt sou asasina Prezidan Jovenel Moise la fè konnen dwayen tribinal premye enstans Pòtoprens la, Mèt Bernard Saint-Vil, chwazi Mèt Gary Orelien pou enstwi dosye a. Sepandan, tankou korespondan nou Renan Toussaint di nou sa a, desizyon Dwayen Saint-Vil la pwovoke reyaksyon negatif pami pwofesyonèl yo nan sektè jiridik la ak dirijan yo nan òganizasyon sosyete sivil la ki panse dosye a twò enpòtan pou otorite yo kite l nan men yon sèl jij enstriksyon.
Klike sou lyen anba a pou w swiv yon repòtaj avèk Renan Toussaint……
Toujou sou dosye asasina Prezidan Jovenel Moise la, jounalis sèvis latino-ameriken Lavwadlamerik la, Cristina Caicedo Smit, fè yon entèvyou pa Skype avèk Ricardo Suñiga, anvwaye espesyal Depatman Deta pou Biwo Afè Oksidantal la, ki pale de patisipasyon Lezetazini nan ankèt k ap fèt sou asasina a. M. Suñiga di, antwòt, si lajistis amerikèn ap pote kontribisyon li nan envestigasyon an, se “an kolaborasyon avèk otorite ayisyen yo”… paske ankèt la dwe reprezante “yon efò ayisyen ke ayisyen dirije e pou pèp ayisyen an.”
Klike sou lyen ki pi devan an pou w gade yon repòtaj Sandra Lemaire prepare avèk entèvyou Cristina reyalize avèk M. Suñiga a.
