Ann Ayiti, nouvo Premye Minis nome a, Enex Jean-Charles, fè depo pyès original li ak kopi yo nan 2 chanm palman an nan jounen mèkredi 23 mas 2016 la. Prezidan tou lè 2 chanm yo, Cholzer Chancy (Chanm Bas la) ak Ronald Larèche (Sena a) konfime demach Misye Jean-Charles la e yo tou lè 2 pwomèt palmantè yo pap pèdi tan pou yo evalye pyès kalifikatif sa yo. Premye Minis nome a di li gen konfyans evalyasyon 2 chanm yo pral bay yon rezilta pozitif kanta desizyon Prezidan Jocelerme Privert pran pou chwazi li kòm pèsonalite ki pou akonpaye li nan tèt Pouvwa Egzekitif la.
Nan peyi d Ayiti tankou nan Dyaspora a, reyaksyon pozitif tonbe aprè nominayon Misye Jean-Charles pou okipe pòs chèf gouvènman an. Si yon majorite palmantè ayisyen aplodi chwa a, yon manm chanm bas palman Eta New Hampshire la Ozetazini, Depite Jean Luniol Jeudy, swete kòlèg li yo ann Ayiti pap pèdi tan pou bay rezilta evalyasyon dosye Misye Jean-Charles la dekwa pou peyi a ka genyen yon nouvo gouvènman anvan lontan.
Yon lòt kote, Anbasadè Vincent Dégert, ki reprezante Inyon Ewòp la ann Ayiti, lanse apèl bay tout pati konsène yo sou sèn politik la pou yo fè efò pou aplike rès Akò 5 fevriye 2016 la. Daprè diplomat la, se ta yon mwayen pou aktè yo avanse ak rechèch solisyon pou pwoblèm peyi d Ayiti ap konfwonte yo. Misye Dégert di kapab gen reta nan aplikasyon akò a; men se sèl enstriman Ayisyen yo genyen pou yo rezoud pwoblèm yo, anyen pa ka ranplase li (“pa gen altènativ”).