Lapolis Nasyonal Dayiti, PNH, mete deyò 28èm pwomosyon li a, lendi 18 desanm 2017 la. Seremoni gradyasyon gwoup polisye tou nèf sa yo dewoule sou wout Frè nan Petyon Vil an prezans, Prezidan repiblik la, Jovenel Moise, Chèf gouvènman an, Jack Guy Lafontant ak plizyè manm kò lejislatif la. Pami yo, prezidan Sena a Youri Latortue ak Prezidan ChanmDepite a Cholzer Chancy.
Nan diskou sikonstans li, Prezidan Moise reyafime angajman adminstrasyon li an pou kontinye sipotè polis la ak founi li tout asistans nesesè pou l fè travay li kòm sa dwa. Anmen tan tou, Chèf deta a, egzòte 1022 nouvo polisye ki gen ladann 125 fi pou yo pran lalwa kòm bousòl yo e pou yo aji avèk pwofesyonalism.
Dapre anpil obsèvatè, Ayiti toujou ap fè fas ak yon vag ensekirite malgre efò otorite yo pou ranfòse enstitisyon PNH la pou bay sekirite nan peyi a. Sa pa gen lontan depi Depatman Deta Ameriken te fè soti yon nòt pou mande sitwayen li yo pou pran prekosyon si yap vwayaje ann Ayiti. Pa twò lontan tou, nan yon operasyon UDMO, yon inite espesyalize nan PNH la nan Pòtoprens, te mennen yon operasyon kont bandi nan Gran Ravin, yon katye popilè repite pou kach kach nèg kap fè move zak sou popilasyon sivil la, e byen 3 polisye te pèdi lavi yo anba men bandi yo ansanm ak plizyè sivil.
Toutfwa, malgre danje polisye yo ap fè fas chak jou nan egzèsis fonksyon yo, anpil jèn ann Ayiti kontinye manisfeste volonte pou yo fè pati enstitisyon sa a ki gen pou deviz pwoteje vi ak byen popilasyon an.
Prezidan Jovenel Moise pandan li tap pale sou enpòtans enstitisyon polis la genyen nan devlopman peyi a, te pwofite montre senpati epi swete kondoleyans li ak fanmi viktim polisye ki tonbe nan egsèsis fonksyon.