Otorite ayisyen yo pran desizyon pou tout tranzaksyon kap fèt nan peyi a, fèt avèk monè lokal, sètadi goud ayisyen.Nan yon arete prezidansyèl ki pibliye nan jounal Le Moniteur, nan dat premye mas 2018 pase a, leta mete entèdiksyon pou tout tranzaksyon lajan nan peyi a pafèt an monè etranje.
Premye Minis ayisyen an, Dr. Jack Guy Lafontant ki tap pale ak laprès kritike fason tranzaksyon ap fèt nan peyi a depi lontan. Dr. Lafotant di li pa posib pou yon moun bral nan yon bal ou byen nan yon restoran, epi se ak lajan ameriken li oblije peye.
Dapre chèf Primati a li pa posib pou “ti-klas mwayèn” nan ap peye lwaye ak lajan ameriken. Premye minis mande tout moun pou yo rete tèt frèt men kan yon tande anpil pale anpil sou dosye sa a.
Atik 8 nan arete prezidansyèl la bay minis finans la pwovizyon legal pou pousuiv moun ki pa respekte desizyon sa a. Minis finans la bò kote pal di li pral mete yon brigad pou ranfòse areta sa a.