Gang ki kidnape 17 manm yon gwoup misyonè ameriken mande yon ranson 17 milyon dola pou liberasyon yo. Se sa Minis Jistis ayisyen an, Liszt Quitel, di Wall Street Journal nan jounen madi 19 oktòb la. Daprè minis la, gang la mande $1 milyon pou chak nan moun li kidnape yo -16 ameriken ak yon kanadyen.
Minis Quitel fè Wall Street Journal konnen timoun ki pami otaj yo gen 8 mwa, 3 zan, 6 zan, 14 zan ak 15 zan.
Ajan FBI ak lòt responsab ameriken ap ede otorite ayisyen yo nan rechèch pou libere otaj yo, ki se manm Christian Aid Ministries, yon misyon pwotestan ki baze nan eta Ohio. 400 Mawozo te kidnape yo samdi 16 oktòb pase pandan yo t ap vizite yon òfelina.
Nan menm jounen madi a, FBI di VOA-Kreyol ke l ap kowòdone efò l ap fè ann Ayiti yo avèk gouvènman ameriken an. Objektif la se garanti ke ameriken yo sòti sen e sòf anba men ravisè yo. FBI di nou: "Akoz konsiderasyon nou dwe fè pa rapò ak operasyon an, nou pa ka bay plis enfòmasyon pou kounye a."
Pòtpawòl Lamezonblanch la, Jen Psaki, ajoute kèk detay lè li deklare:
"Rezon ki fè nou pa bay detay sou operasyon an se paske objektif nou se asire nou ke moun yo retounen lakay yo sen e sòf. E jeneralman li pa nan avantaj nou pou n bay detay presi sou pwosesis la pandan lap dewoule." Madan Psaki fè deklarasyon sa yo nan yon konferans pou laprès ki dewoule chak jou nan Lamezonblanch.
Se menm gang 400 Mawozo sa a ki te kidnape 5 prèt, 2 mè relijyez ak 3 manm fanmi youn nan pret yo nan mwad avril pase a. Yo te vin lage yo apre sa.
Vag kidnaping k ap fèt nan Potoprens te lakoz ayisyen mete yon grèv jeneral sou pye lendi 18 oktòb la. Biznis, lekòl ak transpò piblik te fèmen. Sendika yo ak kèk lòt gwoup te sèmante pou yo te kontinye grev la nan jounen madi a.
Pòtpawòl Depatman Deta a, Ned Price, fè konnen otorite ameriken yo gen kontak ak Polis Nasyonal d Ayiti, gwoup misyonè a epi ak fanmi viktim yo.
Pòtpawòl Nasyon Zini an, Stephane Dujarric, bò kote pa l, fè konnen zak vyolans gang yo ap komèt gen move konsekans sou efò imanite l ONU yo ann Ayiti. Daprè li, gouvènman ayisyen an ta dwe redouble efò l ap fè pou l pote refòm nan polis la epi bay PNH la resous ki nesesè pou l ka jere sekirite peyi a epi mennen ankèt sou tout krim ki fèt sou tèritwa nasyonal la.
Facebook Forum