Yon bato an bwa ki tap transpòte plizyè santèn migran Ayisyen monte sou resif tou pre Key Largo, eta Florid, dapre otorite federal Etazini yo. Yo sispèk bato a tap fè trafik moun.
Gad Kòt Etazini ak kèk lot ajans te kouri ede migran yo ki te gen fanm ak timoun pami yo. Gen 163 moun ki te naje pou rive sou yon plaj nan lanmè a ki pa pwofon nan zòn Ocean Reef Club Dimanch apremidi.
Se menm zon kote otorite Ameriken yo te rete yon bato ki tap transpòte 176 Ayisyen nan mwad Janvye a.
Plizyè pami migran sa yo te bezwen asistans medikal dapre yon mesaj ajan Gad Frontye Walter N. Slosar pibliye sou Twitter Dimanch swa.
"Plizyè ajans te reponn vit e prese e travay ansanm pou pwoteje lavi anpil moun jodia, " Lyetnan Gad Kòt Etazini Jason Neiman deklare sou Twitter.
Li poko klè konbyen moun yo mennen lopital. Imaj Gad Kòt pibliye ke yo pran sou sèn nan montre yon gwo gwoup Ayisyen ki vlope ak sèvyèt e ki chita sou yon plaj.
Responsab Gad Frontyè yo di yap mennen ankèt sou sa yo sispèk se yon operasyon trafik moun.
Nan semèn ki sot pase a, Gad Kòt rete 2 lot bato Ayisyen ki tap navige nan lanmè tou pre Bahamas ak plizyè douzèn migran abò yo.
28 Fevriye pase a, ekipaj la te wè yon vwalye Ayisyen ak 179 moun ak yon distans 50 kilomèk ak zile Andros nan Bahamas. E Vandredi pase a, Gad Kot te rete yon lòt bato Ayisyen ki te gen 123 moun abo li pami yo 39 timoun ak yon distans 16 kilomèt ak Anguilla Cay, Bahamas.
