Premye Minis Edouard Philippe konfime arestasyon yon atakan ki te fonse ak yon machin sou yon gwoup sòlda mèkredi nan vil Pari kote li blese 6 nan sòlda yo.
An Frans, Premye Minis Edouard Philippe konfime nouvèl ki anonse arestasyon yon nòg lapolis sispèk kòm moun ki te fonse ak yon machin sou yon gwoup sòlda nan jounen mèkredi 9 out 2017 la nan kapital la, Pari, kote li blese 6 nan sòlda yo. Nouvèl la fè konnen atak sa a se yon aksyon fèt eksprè.
Lapolis fransèz te ouvè kout-zam sou atakan an ki blese nan machin nan aprè yon koukouwouj ki te dewoule nan pati nò Pari. Premye Minis Philippe -ki te pran lapawòl devan asanble nasyonal la pou l bay detay sou ensidan an- deklare lapolis mete men sou nèg la sou yon otowout ant Pari avèk Boulogne-sur-Mer.
Pòtpawòl gouvènman fransè a, Christophe Castaner, fè konnen biwo komisè gouvènman vil Pari a deja ouvè yon ankèt teworis. Ensidan an rive nan moman sòlda yo tap kite kazèn yo nan katye Levallois-Perret pou yo t al fè patwouy. Majistra kominal Patrick Malkany deklare:
"Mwen pa gen okenn dout sou sa: Atak sa a se yon fèt eksprè. Machin nan pat kanpe; li te vize sòlda yo byen vize epi li te akselere rapidman."
Se 15èm atak konsa ki fèt sou sòlda oubyen polisye fransè pandan 2 zan edmi ki pase yo. Ensidan sa a rive aprè yon seri atanta sou manm lapolis ak lame an Frans. Otorite peyi a deside mete yon gwo pati nan fòs de lòd sa yo nan lari aprè Gwoup Eta Islamik la (GEI) te lanse apèl pou l mande militan li yo lanse atak sou tèritwa fransè a e nan lòt peyi ki te voye avyon yo al bonbade pozisyon gwoup la nan peyi Irak ak Siri.
Plis pase 230 moun --pi fò nan yo se sivil-- mouri nan atak gwoup militan an pandan 2 zan edmi ki pase yo. Pami atak sa yo 2 te fèt nan lane 2015 nan vil Pari epi yon 3èm te dewoule nan vil Nice, nan pati sid peyi a, nan dat 14 jiyè 2016 la nan mitan yon selebrasyon piblik ki tap make fèt nasyonal Lafrans la, Jou La Bastille.