Chanjman nan nivo politik nasyonal la nan Kolonbi : Gouvènman prezidan Ivan Duque a anonse l ap pran dispozisyon trè sevè kont tout ansyen rebèl ki anonse yo pral repran lèzam pou yo kontinye yon konfli sivil ki te dire plis pase 50 lane e ki koze lanmò plizyè santèn milye kolonben. Marie-Luce Pirre pral plase nouvèl sa a nan kontèks li pou nou.
Prezidan peyi Kolonbi a, Ivàn Duque, fè konnen administrasyon li a pa p fè bak devan menas apre li te resevwa nouvèl ki di kòmkwa ansyen rebèl gwoup FARC la (Fòs Ame Revolusyonè Kolonbi a) anonse yo pral repran lèzam pou yo fè respekte dwa politik yo, dwa ki garanti nan yon akò istorik yo te siyen avèk gouvènman an. An menm tan tou, tribinal kolonbyen ki panche l sou kesyon lapè a lanse manda d’arè dèyè yon ansyen kòmandan FARC, Ivàn Marquez, ak tout lòt militan ki pran angajman pou yo antre an rebelyon ankò.
Nan yon anrejistreman video Ivan Marquez fè parèt nan jounen jedi 29 out 2019 la, li anonse gwoup li a pral lanse yon ofansiv tou nèf 3 zan aprè Fòs Ame Revolisyonè Kolonbi a te siyen akò lapè a avèk gouvennman ansyen Prezidan Manuel Santos la pou mete fen nan 5 dizèn lane konfli ame ki t ap dewoule nan peyi a. Nan videyo a, Marquez di rezon-dèt mouvman rebelyon an se pou manm FARC yo kontinye yon batay rezistans kòm repons pou trayizon leta kolonbyen an.
Dapre ajans nouvèl Reuters, Prezidan Ivàn Duque ofri yon rekonpans 863 mil dola pou tout enfòmasyon ki te ka debouche sou arestasyon nenpòt ki moun ki sou video a.
Yon rapèl : Plizyè santèn rebèl ak militan ki t ap defann dwa moun deja mouri depi akò a te siyen an. An plis lanmò sa yo ke yo anrejistre sou tou lè 2 kote yo, plis viktim ki fèt nan mitan sosyete sivil la, le fèt ke gouvènman an sanble li pa tèlman fè efò serye li te pwomèt sou plan ekonomik la pou amelyore kondisyon lavi pèp la, se yon faktè ki vin anvlimen plis toujou divizyon politik ki te déjà egziste nan peyi Kolonbi….