Yon koup, ke otorite yo sispèk nan lave bitcoin ke pirat te vòlè, jwenn arestasyon l madi nan Nouyòk, dapre yon kominike Ministè Jistis. Ilya Lichtenstein, ki gen 34 lane, ak madanm li Heather Morgan ki gen 31 lane, pwal parèt devan yon jij federal nan apremidi.
"Arestasyon ak sezi lajan sa a, pi gwo sezi ministè a janm fè, moutre ke lajan elektwonik pa yon refij pou kriminèl," se kòmantè vis-minis Jistis Lisa Monaco, ke kominike a site.
Nan mwa Daout 2016, yon pirat sou entènèt te antre nan sistèm platfòm Bitfinex e fè plis pase 2,000 tranzaksyon san otorizasyon, kote li vòlè preske 120,000 bitcoin ki nan epòk la te vo $65 milyon dola.
Dapre komisè gouvènman yo, yo jwenn lajan elektwonik la nan yon kès lajan dijital ki anba kontwòl Ilya Lichtenstein ki prezante tèt li sou rezo sosyal yo kòm yon "antreprenè nan teknoloji, ki bati kod e ki envesti nan lajan elektwonik."
Pandan 5 lane apre, 25,000 nan bitcoin sa yo te soti nan kès la e te pase nan "yon labirent tranzaksyon lajan elektwonik" e te sèvi antwòt pou achte lò oubyen sètifika pou verifye objè elektwonik.
Rès la, ki vo kounyea $3 milya 600 milyon dola paske valè bitcoin moute, tonbe, semèn pase a, anba men anketè ameriken ki rele vrè mèt bitcoin yo pou al reklame yo. Otorite yo pa bay non pirat la.
