Sekretè Deta Adjwen Ameriken pou Afè Entènasyonal, Estipefyan ak Aplikasyon Lalwa, Todd Robinson, deklare ke Lèzetazini bay Polis Nasyonal d Ayiti (PNH) 19 machin polis sou 60 gouvènman Biden nan te pwomèt epi li pral remèt lapolis kèk ekipman pwoteksyon.
Misye Robinson ajoute ke Etazini pral travay ak PNH tou pou konbat gang epi enlike nan devlopman kominotè ak pwogram prevansyon vyolans. Sekretè Deta Adjwen an fè konnen:
"Nou dwe pale klè pou n di Ayiti ap fè fas a yon seri defi. Men gang se pi gwo menas pou estabilite sitwayen yo. Gouvènman ameriken an pran menas sa yo trè oserye."
Daprè Misye Robinson toujou, Lèzetazini pral travay ak lòt otorite nan gouvènman an. Yon lòt kote, li deklare Etazini pa gen plan pou li voye twoup militè ann Ayiti; men l ap travay an kolaborasyon sere ak otorite peyi a "pou libere san danje e pi vit ke posib" 16 sitwayen ameriken ak yon kanadyen ke gang 400 Mawozo te kidnape 16 oktòb. Lidè gang lan mande yon ranson $1 milyon pou chak otaj.
Ann Ayiti, otorite yoo nan gouvènman bay yon konferans pou laprès pou yo pale sou mank gaz la ki gaye toupatou, Gang yo bloke tèminal yo pou yo anpeche distribisyon gaz la. Mank gaz la gen move konsekans sou fonksyonnman lopital, lekòl, transpò piblik, konpayi telefòn, bank, ak estasyon radyo ak televizyon yo.
Minis Jistis ayisyen an, Liszt Quitel, deklare: “N ap travay san pran souf pou nou rezoud kriz gaz la... Kriz la konplike."
Bò kote pa l, Minis Defans la, Enold Joseph, di otorite yo ap mennen ankèt pou konnen poukisa 30 tank gaz yo te voye nan rejyon sid la disparèt. Daprè nouvèl yo, gaz la t al vann sou mache nwa.
