Depatman deta ameriken ajoute kidnapin pami lòt rezon ki fè li mande sitwayen ameriken pou yo pa vwayaje ann Ayiti. Nivo 4 sa a se nivo ki pi elve ak koulè wouj nan avi vwayaj Depatman Deta ameriken an mete sou Ayiti ak 3 lèt C pou krim, U pou vyolans, enstabilite ak manifestasyon epi K pou kidnapin.
Nan mwa novanm 2018 pase a Depatman Deta Ameriken te fè konnen, "Moun ki vle ale nan peyi Dayiti ta dwe reflechi byen reflechi anvan yo fè vwayaj sa a akoz manisfestasyon enprevizib kap dewoule tanzantan nan kapital la, Pòtoprens ansanm ak kèk lòt vil nan peyi a.
Krim vyolan tankou vòl ak zam, se zak bandi ap komèt pasi-pala. Anplis desa, polis nasyonal peyi Dayiti a pa genyen resous sifizan pou fè fas ak divès gwo ensidan kriminèl. Sèvis dijans tankou sèvis anbilans limite anpil e, nan kèk ka, yo pa menm egziste."
