Lè gouvènman ameriken an te anonse kèk sanksyon malouk kont oligak ris yo akoz lagè nan Ikrèn nan, sete etap No. 1 an. Kounyela a Washington ak alye l yo ap fòme kèk nouvo ekip pou yo aplike desizyon pou yo “sezi epi jele” gwo bato, pwopriyete kay ak lòt byen de liks ke elit ris la posede.
Minis Trezò ameriken an, Janet Yellen, ak minis jistis la, Merrick Garland, te rasanble pou la premyè fwa mèkredi 16 mas la yon ekip ki te gen reprezantan plizyè ajans ladan l -ekip ki rele REPO- nan kad divès nouvo efò k ap fèt pou egzekite sanksyon yo.
REPO –ki vle di an anglè “Elit, Reprezantan ak Oligak Ris yo- pral travay ak lòt peyi pou mennen ankèt sou oligak yo ak lòt moun ki alye ak prezidan ris la, Vladimir Putin, epi fè yo konparèt devan lajistis.
Pou le moman, ekip la ap mennen ankèt sou 50 moun ak 28 non yo deja pibliye. Gouvènman ameriken an fè konnen sanksyon yo deja kòmanse gen gwo konsekans sou ekonomi ris la.
