JERUSALEM (AP) - Premye Minis Israelyen an pale Dimanch nan telefon ak Prezidan Ris la Vladimir Putin, yon jou apre yon vizit brid sou kou li te fè nan Moskou pou diskite sou envazyon Ikrèn nan ki ap dewoule depi plis pase yon semèn.
Naftali Bennett pale tou ak Chanselye Alman an, Olaf Scholz, ke li te vizite nan Berlin Samdi tou, epi Prezidan Franse a, Emmanuel Macron, bwi prezidans la fè konnen.
Bennett pale nan telefon plizyè fwa ak Prezidan Ikrenyen an Volodymyr Zelenskyy tou - pi resaman Dimanch maten - nan kad jefo diplomatik lap fè pou aji kom medyatè nan batay ant Ikrèm ak La Risi apre plis pase yon semèn.
Met sou sa, minis afè etranje Iraelyen an Yair Lapid pral pran avyon pou Riga, peyi Letoni Lendi, kote li va rankontre Sekretè d'Eta Ameriken an, Antony Blinken, Ministè Afè Etranjè a di.
Pandan Israel kondane envazyon Ris la, li pa pran mezi ki taka vekse Moskou, pou anpeche mete an danje kowoperasyon militè 2 peyi yo nan La Siri.
VIENN (AP) - Ajans Entènasyonal Enèji Atomik la di fos Ris yo ogmante kontwol yo sou santral nikleyè Zaporizhzhia a, ki se pi gwo santral nikleyè nan Ikrèn. Yo te sezi santral sa a semèn pase a.
Direktè jeneral ajans la, Rafael Mariano Grossi deklare Dimanch, anplwaye Ikrenyen yo oblije chache apwobasyon La RIsi pou tout operasyon, menm netwayaj ak reglaj ekipman an. Yo di tou ke La Risi anpeche kominikasyon nomal fèt apre yo etenn kèk rezo entènèt ek telefon mobil nan lye sa a.
AJans regilatwa Ikrèn nan di liy telefon yo ansanm ak kourye elektwonik ak fax pa mache anko. Grossi di li gen "gwo kè sote pou devlopman sa yo" e li ajoute pou santral la ka opere an sekirite "fok anplwaye yo kapab fè travay esansyèl yo nan kondisyon stab, san entèferans ni presyon."
NOUYOK (AP) - Lame Ris la lanse avètisman bay peyi vwazen Ikrèn yo pou yo sispann aksepte avyon Ikrenyen yo ateri lakay yo. Lame a di Moskou taka konsidere yo fè pati konfli a si avyon konba Ikrenyen yo vole apati teritwa yo.
Pot pawol Ministè Defans Ris la, Igor Konashenkov lanse akizasyon pou di Dimanch ke kèk avyon konba Ikrenyen te re-deplwaye nan Woumani ak lot peyi vwazen Ikrèn ke li pa idantifye.
Konashenkov lanse avètisman pou di si avyon de gè sa yo atake twoup Ris yo depi teritwa peyi sa yo li taka "konsidere peyi sa yo ap patisipe nan konfli militè a."
JERUSALEM (AP) - Premye Minis Israelyen an rankontre Prezidan Ris la Vladimir Putin nan Moskou Samdi.
Biwo Premye Minis Naftali Bennett konfime nouvèl sou rakont la nan Kremlen an kèk jou selman apre Bennett te pale nan telefon ak lidè Ris ak Ikrenyen yo.
Biwo Bennett la di li pran avyon pou'l al Moskou bonè Samdi maten, e li te gen avèk li yon minis Kabinè li ki rele Zeev Elkin, ki pale Ris. Tou le 2 mesye yo se Jwif ki nomalman pata vwayaje jou Saba a.
Israel se youn pami kèk peyi ki gen bon relasyon ak tou 2 peyi yo. Israel voye asistans imanitè bay Ikrèn, men li mentni lyen ak Moskou tou pou asire avyon de gè Israelyen ak Ris yo pa antre nan okenn konfli nan peyi vwazen li, La Siri.