Cartagena Kolonbi - Pap Franswa klotire vwayaj li an Kolonbi yon fason ki vrèman pèsonel nan denyè dimanch li nan zòn sa pou l honore sen Peter Claver ki te yon disip Jezuit e ki te konn fè Lamès pou de santen de milye esklav Afriken ki te konn debake nan pò Cartagena a pou vann pandan epòk kolonyal espanyòl la.
Pap Francis ki jiskaprezan pat janm fè ankenn deklarasyon konsènan kriz politik ak imanitè kap pase toukole a, nan peyi Venezuela, te pale de sa nan priyè l tap fè dimanch lan 10 septanm 2017 la kote li te mande pou vyolans politik la fini nan peyi sa a. Pap Francis mande tou pwoteksyon pou malere yo ki yo menm se moun ki toujou sibi pi plis de jan de kriz sa a.
Pap Franswa te rive pi ta mèkredi 6 septanm 2017 la nan Bogota, kapital peyi Kolonbi, pou yon visit 5 jou. Souvren Pontif la te fè visit sa a pou l kenbe yon pwomès li te fè pou l ale Kolonbi yon fwa gouvènman peyi sa a ak gwoup guerrilla yo ta jwenn yon akò pou yo mete fen nan yon gè sivil ki dire plis pase 50 ane.
Pap la te fè pwomès sa a an 2016 epi kèk mwa apre sa lidè gwoup guerrilla FARC ak gouvènman an te siyen yon akò lapè pou mete fen nan lagè a. Majorite pèp kolonbyen an te rejte akò a nan yon referendòm ki te dewoule nan lane 2016 la; men Kongrè a te vin apwouve l nan mwa novanm menm ane a.