Lidè gwoup la, Rodrigo Londono, deklare: “Nou gen gwo defi e menm anpil defi devan nou. N ap plonje nan sistèm an plas la e nou pare pou n chanje li.”
Nan Kolonbi, gwoup guerrilla FARC (ki te vle di anvan "Fòs Zame Revolisyonè Kolonbi") chanje siyifikasyon non abreje sa a nan moman gwoup la pare pou l antre ofisyèlman nan sistèm politik la aprè siyati yon akò li te jwenn ak gouvènman an, sa pa gen lontan, pou l mete fen nan yon gè sivil ki te dire plis pase 50 tan.
Kounye a non abreje FARC la vle di an espayòl "Fuerza Alternativa Revolucionaria del Comùn - oubyen “Fòs Altènativ Revolisyonè Piblik la." Gwoup la di li pral konsève lespri revolisyonè li a, tandiske lidè FARC la, Rodrigo Londono --ki gen pou ti non jwèt "Timochenco"-- fè manm yo konnen tranzisyon an pap fasil. Misye Londono deklare:
"Nou gen gwo defi e menm anpil defi devan nou. Non mond politik la pa gen anyen ki fasil, sitou si ou angaje nan yon mouvman revolisyonè. Rejim ak sistèm an plas la pa fèt pou nou; men n ap plonje ladan n e nou pare pou nou chanje li. Nou mande tout moun pran prekosyon tout kote epi sipòte nou tout kote."
Dirijan FARC yo fè anons la vandredi premye septanm 2017 la sou Plas Bolivar la, tou prè palè nasyonal la nan Bogota. Daprè akò lapè gwoup la te jwenn ak gouvènman Prezidan Juan Manuel Santos la an 2016, pi fò konbatan FARC yo benefisye yon gras ofisyèl (amnisti) e yo gen dwa patisipe nan vi politik peyi a. Antant sa a mete fen nan yon gè sivil ki te dire plis pase 5 dizèn lane eki koze lanmò plis pase 200 mil moun.
Nan kad akò a toujou, Pati FARC la pral genyen otomatikman 10 plas nan kongrè a jiska 2016; aprè sa li ka mennen kanpay pou l ale dèyè plis syèj palmantè. Eleksyon lejislatif ak prezidansyèl fikse pou ane 2018 nan Kolonbi.