Prezidan ayisyen an, Jovenel Moise, anonse, nan fen jounen dimanch 5 out 2018 la, li chwazi sitwayen Jean Henry Céant pou okipe plas Premye Minis la. Pou otorite ayisyen yo fòmalize nominasyon sa a, yo piblye anons la nan gazèt ofisyèl Repiblik la, "Le Moniteur" nan mitan sware dimanch la.
Mesye Céant se yon notè de karyè. An tan ke yon nonm politik, li se fondaatè e dirijan pati Renmen Ayiti. Menmsi anpil obsèvatè deklare li kapab satisfè egzijans ki te travèse divès sektè Prezidan Moise te kontakte atravè konsiltasyon ki te dire plizyè semèn (sitou egzijans pou nouvo Premye Minis la se "yon nonm konsansis", yon "rassembleur"), kesyon ap poze pou mande ki degre chans chèf gouvènman deziye a genyen pou l pase tèst palman an kote li dwe jwenn konsantman tou lè 2 chanm yo (an reyinyon separe ou an asanble nasyonal).
Lidè politik Clarens Renois (UNIR), ki se an menm tan yon analis politik, deklare gen gwo responsiblite k ap tann pwochen Premye Minis la. Pa egzanp li dwe gen talan pèsuazyon ak inifikasyon ase pou l jwenn yon majorite lidè sou sèn nasyonal la (sektè piblik kou sektè prive) pou yo fè l konfyans ase pou asiste l nan egzekisyon plan li pral aplike pou l kondui bak peyi a. Daprè Misye Renois, si palman an konfime Jean Henry Céant, li pa p gen tan pou l pèdi; l ap gen pou li bay rezilta nan yon delè minimòm e fè pwogram politik, ekonomik ak sosyal li yo abouti nan yon tan rekò, paske genyen twòp ijans nan peyi a. Jan lidè UNIR la pale la, li sanble vle di sosyete ayisyèn nan tèlman gen bezwen e nan tout nivo, pa ta dwe gen plas pou erè.
Klike sou lyen an-lè a pou w swiv entèvyou M. Renois avèk Serge Rodriguez ak Lyonel Dessmarattes