Premye Minis gouvènman demisyonè a, Jean Michel Lapin, ki se an mèm tan prezidan Konsèy Siperyè Polis Nasyonal la (CSPN) anonse yon seri dispozisyon pou konbat ensekirite a.
Msye Lapin, ki pat vle bay twòp detay, di CSPN nan prepare yon plan 3 nivo pou fè fas kare ak fenomèn ensekirite a ki kontinye ap fè dlo koule nan je fanmi yo. Selon chèf gouvènman an prezans fòs de lòd yo ap ranfòse pou pwoteje popilasyon an kont kidnaping ak lòt fòm ensekirite.
Lapolis resevwa enstriksyon pou l fouye tout machin san distenksyon k ap sikile nan lari a eksepte machin kò diplomatik yo. Medya yo rapòte te gen yon gwo prezans polisye nan plizyè zòn nan kapital la Pòtoprens jedi maten 13 fevriye 2020 an.
Nouvèl Konsènan Sekirite ak Jistis ann Ayiti:
Anbasad ameriken an nan Pòtoprens mete yon mesaj sou kont twitter li pou l pale de rankont yon delegasyon ameriken an te genyen ak, Minis Jistis la Jean Roudy Aly pou diskite sou detansyon prevantiv pwolonje, konbat trafik moun, ak asire ke jistis fèt sou dosye Lasalin, Bèlè, ak koripsyon piblik.
Apar Sidhu, Direktè Biwo k ap jere Dosye Ayiti nan Depatman deta, fè chita pale ak manm Komite Nasyonal Lit kont Trafik Moun ansanm ak manm pwojè BEST, yon pwojè USAID finanse. Konvèsasyon yo te chita sou estrateji pou lite kont trafik moun ann Ayiti
