Ayiti-Edikasyon ak Sekirite
Wo kòmandman Polis Nasyonal peyi Dayiti (PNH) anonse li pran bon jan dispozisyon pou rantre lekòl la ki fikse pou lendi 5 septanm 2016 la. Pòtpawòl adjwen PNH la, Gary Desrosiers, ankouraje direktè lekòl yo, paran yo ak elèv yo pote kolaborasyon yo bay ak enstitisyon polis la ki gen 2 plan sekirite pou rantre skolè a.
Ayiti-Eleksyon
Kandida a la prezidans pati Lig Altènativ Pwogrè ak Emansipasyon Ayisyèn (LAPEH), Jude Célestin, lanse kanpay elektoral li nan jounen jedi premye septanm 2016 la nan vil Akayè, o nò Pòtoprens. Nan okazyon an, Misye Célestin te genyen bò kete li 3 ansyen kandida a la prezidans ki fè alyans avèk pati LAPEH.
Ayiti-Eleksyon (Suit)
Kandida a la prezidans pati Renmen Ayiti, mèt Jean Henri Ceant, ki pral ouvè kanpay li samdi 3 septanm kap vini la a nan Jeremi, bay yon konefans pou laprès 2 jou anvan sa nan Pòtoprens kote li mande Konsèy Elektoral Pwovizwa a (KEP) garanti eleksyon lib, onèt ak demokratik nan jounen 9 obtòb 2016 pwochen an.