Se CARICOM ki te patwone rankont 3-jou sa ki te fèt nan kapital Jamayik 'Kingston' ke gwoup Pèsonalite Eminan te prezide.
Gwoup sa a gen kòm manm ansyen premye minis: Bahamas Perry Christie, Jamayik Bruce Golding epi St. Lusi Kenny Anthony.
Premye Minis Ayisyen Ariel Henry ak Minis Afe Etranje Jean Victor Geneus te patisipe tou.
Rankont la te gen kòm bi pou pèmèt plizyè lidè politik yo ak manm sosyete sivil la diskite sou yon solisyon pou ede peyi a rezoud kriz politik la ak ensekirite a.
Rankont yo te kòmanse Dimanch 11 jen 2023 e yo te rive nan bout yo 13 jen 2023.
Tout sesyon yo dewoule dèyè pòt fèmen - laprès te entèdi asiste seyans yo.
Plizyè sektè nan klas politik la te fè deplasman nan Jamayik, tankou Edmonde Beauzil ki te reprezante FUSION, ansyen depite Arodon Bien Aimé ki nan pati politik KONPROMI ISTORIK, André Raphaël ki nan MOPOD, Pierre Jean Raymond Andre ki te reprezante COODAH, mèt Andre Michel ki se pòtpawòl Sektè Demokratik ak Popilè a, Pierre Esperance direktè RNDDH (Rezo Nasyonal Defans Dwa Moun), ak Clarens Renois, reprezantan pati UNIR.
Sete premye fwa dyaspora a an te resevwa envitasyon ofisyèl pou l patisipe nan diskisyon sou kriz Ayiti a.
Te gen yon rankont menm jan an ki te fèt ann Ayiti, dapre Mèt Andre Michel ki te siyen “akò 21 desanm 2022” a, kote li di plizyè sektè te deside pa mete pye.
Apre dènye jou rankont lan, plizyè reprezantan te bay VOA opinyon yo sou sa ki te diskite. Yo te pale nan mikwo anvwaye espesyal nou Valerio Saint Louis ak korespondan nou nan Pòtoprens, Yves Manuel.
Dapre Jean Raymond Andre: “Tout moun kanpe sou pozisyon yo. ”
Mèt Andre Michel kontinye pou l di Premye Minis Ariel Henry pwopoze pou li fè chanjman nan gouvènman an, e li te vini ak lide pou laji Wo Konsèy Tranzisyon HTC pou l gen 5 manm. E gen lòt gwoup, dapre Andre Michel, ki pwopoze pou gen yon Kolèj prezidansyèl ki gouvène peyi a ansanm ak PM Ariel Henry. Pou mèt Michel, pwopozisyon ki fèt yo se pat pou jwenn yon antant pito sèlman pou pwovokasyon.
Responsab Dwa Moun Pierre Esperance di diskisyon yo te chita sou kesyon gouvènans, inpinite, sekirite, men ke yo te plis konsantre sou kesyon gouvènans akoz, dapre plizyè patisipan, peyi a gen nan tèt li PM Henry ki pap byen dirije. Espérance ajoute ke HTC a pa kanpe sou anyen paske li pa gen okenn pouvwa, e ke se jis yon gwoup konsiltasyon. Dapre responsab dwa moun nan, fòk ta gen yon pouvwa pou ede PM nan dirije peyi a.
Depite Antoine Arodon ki te patisipe nan deba yo tou di “Valerio mwen wont. Se yon desepsyon pou mwen, se avek tristès mwen ap tounen lakay.” Ansyen palmantè a di li te vini nan Jamayik ak konviksyon ke deba yo ta pral debouche sou yon antant.
Premye Minis Henry, nan chita pale ak laprès apre li te retounen Ayiti fè konnen dyalòg yo pral kontinye nan Pòtoprens, ak patisipasyon plis gwoup politik.
