Moun kap travay nan yon òfelina nan zòn Fèmat, vil Kenskòf, tou pre kapital la Pòtoprens, fè konnen gen anviron 13 timoun ki pèdi lavi yo nan dife ki te eklate nan lannuit 13 pou rive 14 fevriye pase a nan lokal sila ki pote non Church of Bible Understanding.
Se yon gwoup ki pa la pou fè pwofi e ki baze nan Pennsylvani ki ap dirije òfelina a. Rose-Marie Louis ki se youn nan travayè kap pran swen timoun yo nan òfelina a di Associated Press ke li te wè sekouris yo ki tap soti ak kò 13 timoun yo ki ta peri nan dife a
Marie-Sonia Chery, yon enfimyè nan lopital Misyon Batis la ki tou pre a, konfime ke 12 ti gason ak yon ti fi te mouri.
Catiana Joseph ki se yon doktè nan lopital Batis la te bay yon kont diferan, kote li fè konnen ke viktim yo te ant 3 ak 18 an. Pat gen okenn eksplikasyon imedyat pou erè sa.
Louis, ki te travay nan kay la, di ke dife a te kòmanse jedi ozalantou 9è di swa e ponpye te pran apeprè 1.5 èd tan pou rive. Ofelina a te itilize bouji kòm ekleraj, akòz dèlko ak invètè yo te gen problem.
Church of Bible Understanding ki se òganizasyon k ap dirije òfelina a te pèdi akreditasyon l apre yon seri de enspeksyon kite kòmanse nan mwa novanm 2012. Enspektè ayisyen yo te kritike gwoup la akòz yo te gen twòp moun, move kondisyon sanitè, avèk tou yo pa te gen ase anplwaye ki byen fòme.
Yon manm nan òganizasyon an ki idantifye tèt li kòm “Jim” nan yon apèl telefonik, refere kesyon sou dife a bay avoka yo an Ayiti, san l pat menm idantifye ki moun.