Ann Ayiti, Konsèy Elektoral Pwovizwa a resevwa, nan jounen jedi 8 septanm 2016 la, yon dènye kagezon kit elektoral pou òganizasyon eleksyon prezidansyel ak lejislatif pasyèl ki fikse pou 9 oktòb pwochen an. Misye Antoien –ki pale ak laprès nan momam li tap resevwa materyèl yo nan Ayewopò Toussaint Louverture nan Pòtoprens-- fè konnen Konsèy la pa prevwa okenn kontraryete nan preparasyon randevou 9 oktòb la.
Yon lòt kote, yon mwa avan eleksyon yo dewoule, kandida yo ap ranfòse kanpay yo atravè Ayiti. Se konsa kandida Pati Ayisyen Tèt Kale (PHTK), Jovenel Moïse, te ale nan vil Pòtapiman, nan rejyon sid peyi a, kote li prezante pwogram politik li bay popilasyon an epi mete devan elektè yo rezon ki ta dwe fè yo vote pou li.
Bò kote pa l, kandida a la prezidans pati LAPEH a, Jude Célestin, ki pale jedi 8 septnam nan avek Lavwadlamerik, deklare se responsabilite lidè politik kap patisipe nan konpetisyon elektoral la pou yo motive polilasyon an pran wout biwo vòt yo nan jounen 9 oktòb pwochen an.
Anfen Chanm Depite ayisyen an vote, nan jounen mèkredi 7 septanm 2016 la, yon pwojè-lwa sou Blanchiman Lajan ak Finansman Aktivite Teworis. Se Depite Jerry Tardieu ki te prezante rapò sou pwojè lwa sa a devan manm Chanm Bas la.