Gwoup Fatima a siyen yon akò finansman ak reprezantan Overseas Private Investment Corporation(OPIC) pou finanse konstriksyon yon 2èm otèl Marriott nan vil Kap-Ayisyen an.
Se prezidan ai gwoup envestisman prive ameriken an David Bohigian ki siyen akò a pou yon valè 19.5 milyon dola pou konstriksyon otèl la k ap dire 2an. OPIC se yon ajans otonòm gouvènman ameriken an ki ede antrepriz ameriken envesti aletranje.
Ayiti pami 5 peyi nan Karayib la Mesye Bohigian ap vizite sou demand Prezidan Donald Trump k ap ankouraje envestisman ameriken nan peyi sa yo. Lòt peyi yo se Bahamas, Jamayik, Repiblik dominikèn ak Sent Lisi--5 peyi k ap sipòte Etazini nan Oganizasyon Eta Ameriken yo. Prezidan peyi sa yo te rankontre Prezidan Trump sa pa gen lontan nan Mar-a Lago.
An plis de ofisyèl yo, delegasyon OPIC la rankontre manm sektè prive a pou diskite posibilite pou antrepriz ameriken yo fè plis envestisman ann Ayiti.
