Biwo Kantansye Elektoral Nasyonal la (BCEN) te òdone verifikasyon 10 % nan pwosè vèbal prezidansyèl 20 navanm 2016 la ki reprezante yon total 1560 pwosè vèbal. BCEN nan te bay otorizasyon pou kòmanse verifikasyon sa yo lendi 20 desanm 2016 la nan apre midi, yon nouvèl kandida kontestatè yo te byen akeyi. Dapre kèk obsèvatè, se petèt denye desizyon ki pral mete yon bout nan kontestasyon kous prezidansyèl ann Ayiti.
Verifikasyon yo ap kontinye jounen 21 desanm 2016 la an prezans obsèvatè nasyonal ak entènasyonal. Men tou avèk patisipasyon reprezantan pati politik tankou: reprezantan kandida alaprezidan Jude Celestin (LAPEH), Moise Jean Charles (Pitit Desalin), e Maryse Narcisse (Fanmi Lavalas).
Senatè Sidès la, Dieupy Cherubin, di li salye desizyon Biwo Kontansye Elektoral la pran pou l otorize kandida kontestatè yo pou yo al verifye e konpare pwosè vèbal yo ak lis emajeman rezilta eleksyon prezidansyèl novanm pase yo.
Klike sou lyen odyo a pou w tande deklarasyon Senatè Cherubin an nan mikwo korespondan Lavwadlamerik nan Pòtoprens, Orpha Dessources.
