Nan Afrik di Sid, Prezidan Cyril Ramaphosa kondane zak vyolans, dechoukaj ak piyaj k ap dewoule depi 3 jou nan kèk vil tankou Johannesburg ak kapital administratif peyi a, Pretoria, kote popilasyon lokal la pa sispann atake pwopriyetè biznis ki gen nasyonalite etranje yo.
Prezidan Ramaphosa di zak vyolans sa yo totalman innakseptab. Nan yon deklarasyon ki parèt sou video nan jounen madi 3 septanm 219 la, Misye Ramaphosa fè konnen peyi a “pa kapab tolere atak k ap fèt sou sitwayen etranje k ap viv ladan l.”
Lapolis te pran lari nan divès katye Johannesburg avèk Pretoria nan moman zak vyolans yo rive sou 3èm jou yo. Fòs de lòd yo poze arestasyon 90 endividi nan 5 zòn kote magazen ak boutik yo sibi move konsekans zak vyolans yo. Anpil biznis ki vid rete fèmen tandiske pwopriyetè yo (pi fò nan yo se etranje) pè retounen nan pwopriyete yo.
Yon sitwayen vil Johannesburg, yon mèt magazen ki rele Abushe Dastaa, deklare:
“Lè nou te vin isit la, apre minui, pou n te konnen kijan magazen nou yo te ye, dechoukè te gen tan piye tout bagay. Yo ale avèk menm frijidè nou te genyen la a; yo pran tout bagay; nou pa rete anyen ditou kounyela a. Kidonk, nou pa gen le chwa.; e pa gen pèsonn ki vle pran chans vini bò isit la.”
Nan jounen lendi 2 septanm 2019 la gouvènman peyi afriken yo te lanse avètisman bay sitwayen yo k ap viv nan Afri di Sid pou mande yo pran anpil prekosyon pou sekirite yo; yo pa t kache di kijan yo pa kontan akoz dènye vag vyolans kote moun ap atake etranje ki posede biznis nan Afrik di Sid.
Daprè laprès nan Etyopi, ofisyèl anbasab peyi sa a nan Afrik di Sid bay sitwayen yo konsèy pou yo fèmen biznis yo jiskaske lapè ak tankilite va retabli; tandiske nan peyi Zimbabwe depatman transpò ak kominikasyon lanse avètisman bay chochè kamyon gwo transpòtè yo pou mande yo pa vwayaje nan Afrik di Sid.
Marie-Luce Pierre prezante yon vèsyon televise repòtaj sa a.