Otorite yo nan lame Lèzetazini fè konnen yon sòlda ameriken ki te estasyone nan Afganistan mouri nan konba lendi 23 desanm 2019 la. Nan anons sa a, ki sòti nan katye-jeneral lame amerikèn nan nan Afganistan, responsab yo pa bay detay sou ki kote ni kijan sòlda a fè pèdi lavi li.
Militan Taleban yo fè parèt yon nòt poulaprès kote yo di sòlda a tonbe nan pwovens Kenndouz ki chaje ak dezòd nan pati nò peyi a. Gwoup militan an ajoute li te vize ni sòlda ameriken, ni sòlda afgan avek yon bonm li te plase arebò yon wout kote militè sa yo t ap eseye lanse yon operasyon kont pozisyon Taleban yo nan komin Char Dara. Pi fò nan rejyon sa a anba kontwòl militan yo tandiske se katye jeneral lame a sèlman ki anba men gouvènman afgan an.
Nouvèl yo fè konnen lagè k ap dewoule nan Afganistan an (ki se lagè ki dire pi lontan nan tout istwa patisipasyon Lèzetazini nan yon konfli) deja koute Washington preske yon trilyon dola (swa mil milyon dola ), tandiske anviwon 2 mil 300 sòlda ameriken pèdi lavi yo.