Dominik-Venezuela
Prensipal pati opozisyon sou zile la Dominik la ap ankouraje gouvènman Roseau a rejte òf Venezuela fè pou l' bati yon rafinri petwòl sou zile a paske, daprè lidè pati a (Pati Travayis Uni la Dominik la) sa kapab nui imaj peyi karayib sa a.
Yon lòt kote, lidè Pati a, Edison James, di gouvenman an dwe chèche pran kontwòl yon ti zile ki tou prè a nan men Venezuela--an palan de Birds Island (Zile Zwazo yo) pou fè pwomosyon ekotouris.
Arabie Saoudite / Santo-Domingo.
Arabi Sawoudit anonse li genyen plan pou l' konstwi yon rafinri petwòl nan Republik Dominikèn. Ministè afè etranjè dominiken an apwouve projè a wiken pase a. Anbasad Arabi Saoudite nan Washington pale pou l di Wayòm saoudyen an byenn akeyi yon propozisyon minis afè etranjé dominiken an, Carlos Morales Troncozo, te fè pandan yon vizit li nan Riyadh pou otorite 2 peyi yo travay ansanm sou yon estrateji pou konstriksyon rafinri a. Pandan vizit sa a, Santo-Domingo ak Riyadd te anonse yo dakò pou yo tabli relasyon diplomatik antre yo.
CUBA - CASTRO
Minis afè etranjè ak minis enteryè a nan Kuba (2 pwòch kolaboratè prezidan Fidel Castro) di lidè kiben an ap reprann ni aprè operasyon li te subi nan entesten ane pase a e sa pap pran twòp tan ankò pou li petét rekomanse travay ofisyèl li nan gouvenman an. Men, daprè kèk espesyalis, nouvèl ekip ki sou pouvwa a deja kòmanse enpoze yon lòt stil sou gouvenman la Avàn nan. Nan yon diskou prezidan Bolivi a, Evo Morales, fè li deklare li atann aske msye Castro retounen travay nan fen mwa avril la. Tandiske prezidan asanble nasyonal Kiba a, Ricardo Alarcon, di li sèten msye Castro pral refè ase pou l' repran responsabilite li.
Sepandan, yon analis politik nan Miami di si msye Castro retounen sou pouvwa a, li ka oblije reponn kèk kesyon sou sante li. Se opinyon Andy Gomez, kap travay nan Enstiti Etid Kibèn ak Etid amerikano-kibèn nan Inivèsite Miami an.
"Kesyon nou dwe poze tèt nou, se eske Castro ap gen fòs ase e eske lap gen ase kapasite mantal pou l' mande pou l dirije Kiba jan li te fè sa pandan 50 dènye ane yo."
Anpil obsèvatè di depi Fidel Castro te remèt rèn pouvwa a nan men ti frè li Raul Castro nan mwa jiyè pase a, chanjman deja komanse fèt sou il komunis la. Nan moman gouvènman Kiben a komanse sibi kèk transfòmasyon, Andy Gomez deklare politik Lèzetazuni vizavi Kiba dwe chanje tou.
Pwofesè Gomez di:" Nou bezwen komanse panse a lavni e ki sa nou, an tan ke yon peyi nan komunote entènasyonal la, kapab fè, nan yon moman ki trè krtitik, pou nou akselere chanjman nan Kiba, lè n konsidere sa kap pase nan Amerik Latin nan". Andy Gomez fini pa di li santi Lezetazuni dwe komanse revize politik sevè li a ki entèdi ameriken fè pi fò tip komès ak lòt kalte tranzaksyon avèk Kiba.
JAMAYIK
Premye minis Jamayiken an, lonorab Portia Simpson Miller, fè konnen tristès li devan lanmò subit antrenè ekip jwèt krikèt Pakistan an, Bob Woolmer. Yo te jwenn antrenè a san konesans nan chanm lotèl li, nan La Jamayik, lendi 19 mas la nan maten. Otorite yo bay afè sa a anpil enpotans...e gouvenman jamayiken an pare pou l' ofri nenpòt ki asistans ki nesesè nan okazyon tris sa a. Otorite jamayiken yo ap mennen ankèt pou yo chache konnen ki sa ki provoke lanmò antrenè a.
NDLR:Se te Revi Karayib la, yon segman Marie-Luce Pierre prepare e prezante chak mèkredi maten sou Lavwad'lamerik.