Administrasyon Trump la pran mezi pou voye tounen pa-bann-e-pa-pakèt plizyè milye migran pami yo jèn konpatriyòt ayisyen.
Pati politik Inyon nasyonal pou entegrite ak rekonsilyasyon (UNIR) ke pwofesè Clarens Renois ap dirije, pa kache enkyetid li devan mezi sa a li di ki lage gwo tèt chaje nan mitan Ayisyen k ap viv ozetazini.
Pati UNIR lanse yon apèl bay Konsèy prezidansyèl tranzisyon an pou li "mache prese prese al chita pale ak gouvènman ameriken an pou defann dwa jèn konpatriyòt ayisyen yo li estime ki te vwayaje legalman nan kad pwogràm Biden nan".
Clarens Renois, kwè leta ayisyen dwe reyini kondisyon apwopriye k ap pèmèt Ayisyen rete viv ak travay Annayiti san yo pa bezwen gen lide al pran imilyasyon nan lòt peyi.
VOA te eseye antre an kontak ak Ofis nasyonal migrasyon (ONM),pou konnen èske gen yon plan ki deja elabore pou resevwa moun Etazini ap ekspilse yo, yo pat bay repons .
Sepandan gen enfòmasyon ki fè kwè Konsèy prezidansyèl tranzisyon an ta ap travay sou yon espas nan komin taba pou akeyi tout Ayisyen Leta ameriken ta voye tounen Ann Ayiti.
