Nan yon lèt misyon Panama nan Nasyonzini te bay Guterres, li te fè konnen remak msye Trump fè nan seremoni prestasyon sèman li an lendi 20 janvye a "bay kè sote ".
"Nou mande biwo w yo pou transmèt kominikasyon sa a bay 15 manm Konsèy Sekirite Nasyonzini yo".
Dapre sa diplomasi panameyèn nan di nan lèt la, peyi Panama vin manm konsèy la depi 1ye janvye pase a.
Nan diskou prezidan Trump te fè jou envestiti li a, li te repete yon lòt fwa ke etazini "repran" kontwòl Kanal Panama a, yon vwa maritin ant lanmè Atlantik la ak lanmè Pasifik la Etazini te inogire an 1914. Washington te transfere operasyon kanal la bay Panama an 1999.
Trump di yo takse bato Ameriken yo "twòp" nan kanal la.
Li kontinye pou l di "Yo mal trete nou apre kado san sans saa nou bay la, nou pat dwe janm bay kontwòl kanal la. Pwomès Panama te fè nou an pa kenbe."
"E se Lachin kap opere Kanal Panama a, epi nou pa t 'ba yo l pou yo te lage kontwòl li nan men Lachin, nou te bay Panama li. Epi nou pral reprann kontwòl li ".
Prezidan an pa bay detay sou kijan li pral repran kontwòl kanal la.
