Biden ak Trump Pataje yon Limouzin
- By AP
Prezidan Joe Biden ak Prezidan-eli Donald Trump pataje yon limouzin ansanm ak Senatè Minnesota Amy Klobuchar, ki se direktris Komisyon Bipatizan Seremoni Envestiti yo.
Biden ak Trump se rival anmè depi plizyè zane. Sepandan, prezidan sotan an ak prezidan kap antre a te monte nan menm machin nan pou al asiste seremoni envestiti a ann akò ak tradisyon politik peyi Etazini.
Trump, Vance Rive Capitol la pou Seremoni Envestiti a
- By AP
Repibliken ak Demokrat Kongrè kapab chita nempot ki kote yo vle paske pa gen syèj deziye pou seremoni an. Yo te pwofite pran kèk selfie anvan seremoni an te komanse.
Nou te ka wè milyadè ki apiye Trump yo sou plas. Pami yo: PDG Tesla, X ak Space X, Elon Musk, PDG Meta (Facebook, WhatsApp, Instagram) Mark Zuckerberg, epi PDG Amazon ak Washington Post, Jeff Bezos.
Prezidan Ajanten an Javier Milei ak Premye Minis Italyèn Giorgia Meloni ap asiste seremoni an tou.
Yon lot etranje ki te sou plas se PDG TikTok la, Shou Zi.
Trump te ekate l ak tradisyon Amerikèn nan lè li deside envite lidè etranje nan envestiti li.
Yon lot kote, foul la pa mete dlo nan bouch li pou montre kiyès li apiye ak kiyès li rejte. Gen yon nèg ki te kenbe yon pannkay ki di "Joe Biden Nou Revoke w".
Sepandan foul la te rele chal bari dèyè ansyen vis prezidan Trump la, Mike Pence, lèl te rive nan Rotunda a.
Yo rele chal bari pi fo lè Bill ak Hillary Clinton te rive nan Capitol la.
Trump Eseye Bo Madanm ni
Prezidan-eli Donald Trump eseye bo madanm ni men sanble chapo mamzèl te anpeche l fè sa.
Apre li te antre nan Rotunda Capitol la, Trump te salye Prezidan Joe Biden. Foul la te bat bravo ak kè kontan.
JD Vance Prete Sèman Kom Vis Prezidan Etazini
JD Vance sot prete sèman pou l tounen ofisyèlman Vis Prezidan peyi Etazini.