Zòn metwopoliten Washington DC a anba nèj apre yon tanpèt frape l bonè Lendi nan moman Kongrè a tap sètifye rezilta eleksyon prezidansyèl 2024 la epi fè preparasyon pou lantèman Prezidan Jimmy Carter pi ta semèn sa a.
Kamyon tap monte desann sou wout prensipal yo pou wetire nèj ki gonfle nan zon touristik tankou Capitol la, Lamezonblanch, Obelisk la, epi Katedral Nasyonal Washington nan, kote fineray ansyen Prezidan Carter pral dewoule.
Eta Maryland ak VIjini anba gwo nèj tou Lendi.
James Rastatter te sèvi ak chèn ke li tache sou kamyon li pou grenpe yon morn chaje ak nèj nan Woodbridge, Vijini.
" Map eseye grenpe morn sa a ke nèj la definitivman bloke."
Lapolis eta Vijini pibliye yon kominike pou di yo konstate plis pase 200 aksidan sou wout yo ant 4hè nan apremidi Dimanch epi 4hè di maten Lendi. Se pa tout ki te gen pou wè ak tanpèt nèj la.
Gen moun ki blese nan aksidan sa yo epi yon moun mouri. Lapolis di yon jèn gason 32 zan tap fè vitès epi kamyon li al frape yon pye bwa. Misye di kondisyon wout yo pat bon, li pat mete senti sekirite epi sanble li tap bwè.
Otorite yo mande piblik la pou l pa pran lari amwenske li absoliman nesesè pou ke ekip yo ka gen tan debleye nèj sou wout yo.
