Michael Brun te pataje nouvèl lanmò manman l, Sharon Andrea Lee-Brun, yè madi 10 desanm 2024 la.
DJ a t ekri yon pòs tou long pou l t onore manman l epi rakonte tout pasyon li te genyen pou kizin, dans, mizik, lekti ak lanati. Li raple tou tout valè manman l te rive transmèt li pandan li te vivan.
« Ou t aprann mwen bay « le meilleur de » mwen menm. Ou t aprann mwen pou m janti. Ou t aprann mwen pou m pa janm abandone rèv mwen yo. Ou te kwè nan mwen menm lè mwen menm mwen pa t kwè nan tèt mwen », se sa nou li nan pòs sa a Michael Brun t ekri ann anglè.
Òganizatè Bayo Tour a pa t janm kache atachman l pou manman l sou entènèt la. Nan lane 2021, li te poste yon foto kote li te kale tèt li wòz pou sipòte madan Brun ki te gen kansè nan tete e ki te sot swiv premye seyans chimyoterapi l.
Menmjan tou sa gen 4 lane, se t avèk anpil lakontantman li te pataje ak piblik la nouvèl dènye seyans chimyoterapi manman l te swiv nan kad tretman sa a.
