« Merci mon Dieu. Merci à vous », se sa chantè a t ekri sou paj enstagram li joedwetfile pou anonse nouvèl la nan yon videyo li poste kote li fenk leve nan dòmi ak bwòs dan l nan bouch li.
« 4 Kampé » se yon mizik k ekri an pati nan lang kreyòl. Mizik sa a te soti 25 oktòb 2024. Li se youn nan mizik k ap konnen anpil siskè pandan peryòd fen ane a.
Nan mwens pase yon mwa, se dezyèm mizik Joé Dwèt File ki sètifye « Single d’or ». 11 novanm 2024, atis la te fè yon pòs sou kont enstagram li pou li t anonse SNEP te sètifye mizik li ki rele « Fè m voye a ».
« Single d’Or » se yon distenksyon Syndicat National de l’Édition Phonographique (SNEP) bay yon atis pou fè konnen yon mizik li oswa yon albòm li rive kontabilize 15 milyon « équivalent streams ».
