Lame Liberasyon Pèp la (PLA) "te mete restriksyon nan 7 zòn nan espas aeryen yo nan rejyon lès Zhejiang ak Fujian", 2 pwovens Chinwa ki sitiye an fas Taiwan, se sa Minis Defans Taiwan lan te di nan yon konferans pou laprès.
Restriksyon sa yo, li te ajoute, an vigè depi Lendi pou rive Mèkredi.
Taipei te anonse tou ke li te detekte bato militè Chinwa ak gad kòt k ap navige toupre kanal Taiwan ak nan Oseyan Pasifik la.
Kòm repons, otorite Taiwan yo te anonse ke yo te antreprann "manèv pou yo prepare yo pou konba" epi mete fòs ame yo sou "eta" d alèt.
Nan pwosesis la, Peken te di ke li te vle " defann souverènte nasyonal li yo ak entegrite teritoryal li yo", paske yo dekri Taiwan kòm yon pati "inalyenabl" nan Lachin.
Restriksyon aeryen Chinwa sa yo ak prezans bato militè Chinwa yo toupre Taiwan rive kèk jou apre fen vwayaj Prezidan Taiwan Lai Ching-te nan rejyon Pasifik la.
Se premye vwayaj Mesye Lai aletranje depi li te chita sou chèz boure a nan mwa me a. Peken te kondane fòtman vwayaj Lai, ke li opoze ansanm ak nenpòt kontak ofisyèl ant Taipei ak peyi etranje yo.
