Film mizikal odasye Jacques Audiard la "Emilia Perez", ki rakonte istwa yon Bawon dwòg ki sibi operasyon pou tounen yon fanm. Film sinema sa a ranpòte plis nominasyon pou pri nan 82èm seremoni remiz pri Glob D Or yo pase tout lòt yo - a savwa 10.
Sa mete l devan film mizikal popilè "Wicked" epi film dramatik "Conclave" ki gen pou wè ak lanmò pap la, epi film de gè "The Brutalist".
Nominasyon pou pri Glob D Or yo, ke chèn televizyon CBS te difize an dirèk Lendi. Se aktris Mindy Kaling ak aktè Morris Chestnut ki te anonse nominasyon an.
Seremoni remiz pri a pral dewoule 5 Janvye. Moun kapab suiv li sou CBS epi rezo streaming Paramount +.
Drama ki santre sou yon jèn Donald Trump ki rele "The Apprentice" ranpòte nominasyon tou pou 2 prensipal aktè li yo - Sebastian Stan ki jwe Trump epi Jeremy Strong ki jwe Roy Cohn.
