Alòske repibliken an te refize ale nan seremoni envestiti demokrat la an 2021.
"Prezidan an te pwomèt li pral asiste envestiti moun ki ranpòte eleksyon an, kèlkeswa moun li ye. Li menm ak Premyè dam nan pral onore pwomès sa a epi yo pral asiste seremoni envestiti Donald Trump," Andrew Bates, pòtpawòl adjwen Mezon Blanch, te di nan yon deklarasyon pou laprès. Deklarasyon sa a diferan ak desizyon milyadè a te pran 4 lane de sa.
Nan epòk sa a, Etazini te sou chòk, apre atak sou Kapitòl la nan dat 6 janvye pa patizan Donald Trump yo, nan menm jou kote yo te sètifye viktwa Joe Biden. Yon jou vyolans ki te boure ak akizasyon san prèv Donald Trump te fè pou fwod elektoral pandan eleksyon an.
Kat lane apre, Joe Biden konsidere prezans li nan envestiti a kòm "yon demonstrasyon enpòtans angajman pou respekte valè demokratik nou yo ak onore volonte pèp la, pandan nap kontinye garanti yon tranzisyon ki òdone ak efikas," Andrew Bates ajoute.
Pandan kanpay elektoral la, Joe Biden te souvan dekri Donald Trump kòm yon danje pou demokrasi. Men prezidan an te angaje l pou asire yon tranzisyon pouvwa ki pi dous posib apre viktwa repibliken an sou Kamala Harris nan dat 5 novanm.
Kèk jou apre eleksyon an, de prezidan yo te rankontre nan Mezon Blanch la sou envitasyon Joe Biden, ki te felisite rival li pou viktwa li nan eleksyon an.
