Tribinal la deside aktè ki gen 42 lane, ki te kondane an mas 2022 nan Chicago, pa t dwe jwenn yon dezyèm akizasyon, paske te gen yon premye akò mityèl pou abandone pouswit yo.
Mesye Smollett, ki se yon Afro-Ameriken, omoseksyèl, te rekonèt koupab dèske li te òganize yon fo agresyon an 2019 nan Chicago, kote li te peye 3,500 dola bay de frè ki gen orijin Nijeryen, epi li te bay fo temwayaj plizyè fwa devan lapolis.
Agresyon sa a te pwovoke gwo endiyasyon Etazini, yon peyi ki toujou gen gwo divizyon rasyal ak seksyèl, anvan envestigatè yo te rive dekouvri, gras ak imaj kamera siveyans ak analiz done telefòn, Sete yon konplo.
Aktè seri "Empire" lan te vin jwenn akizasyon, men yo te abandone pouswit yo apre yon akò kote Jussie Smollett te deside pa reklame 10,000 dola li te mete kòm garanti epi li te pran angajman pou fè travay kominotè.
Desizyon sa a te konsidere twò senp pa kèk otorite lokal, tankou ansyen majistra demokrat Chicago a, Rahm Emanuel.
Yon pwokirè espesyal te repran dosye a epi te fè yon lòt akizasyon kont aktè a, ki te toujou deklare inosan pandan tout pwosesis la.
Apre kondanasyon li, Jussie Smollett te libere pandan li t ap tann rezilta apèl li.
Pou Kou Siprèm Illinois, akize aktè a yon dezyèm fwa apre li te "ranpli obligasyon li nan kad akò a" se yon vyolasyon dwa li pou yon jijman ekitab.
