Elektè Ozetazini pral depoze bilten Madi pou chwazi pwochen prezidan yo. Sondaj politik yo endike kandida yo - Donald Trump ak Kamala Harris ap fè konpetisyon sere.
Kamala Harris pase denye jou kanpay elektoral la nan eta "balanswa" Michigan, kote li rankontre elektè yo nan yon restoran.
Li te pale tou nan yon legliz lokal kote li te di elektè yo ak pati Demokrat la ke yo asosye souvan ak koulè ble a - ap kole tèt ansanm ak elektè Repibliken ke yo konn asosye ak koulè wouj la.
"Mwen wè yo peyi ki detèmine pou l tounen paj rayisman ak divizyon an epi trase yon nouvo chimen. Lèm vwayaje mwen wè Ameriken nan swadizan eta wouj yo ak swadizan eta ble yo ki pare pou chanje lista epi apiye jistis."
Donald Trump mennen kanpay nan eta balanswa Kawolin di No kote li di patizan yo li gen konfyans lap genyen eleksyon an.
"Paske nou gen yon gwo bèl avans. Tout sa nou gen pou fè se al vote Madi."
Trump di patizan li yo ke opozan yo deja ap eseye fè koken.
" Yo triche nan eleksyon epi ou denonse yo epi yo vle lage w nan prizon. Reflechi byen. Se yon bagay enkwayab. Men m renmen l. Poukisa? Paske nou pwouve yon bagay. Nou montre yon bagay. E nou pral ranje sa. Fok nou genyen eleksyon an. "
Pandan yon miting, Trump sigjere anko pou komèt zak vyolans kont opozan politik li - fwa sa a li vize laprès.
Harris di eleksyon sa a depase politik patizan ak moun kap chache ogmante divizyon, chofe rayisman, pwopaje pèrèz epi kreye kawo.
"E mwen pwomèt pou m koute moun ki pa dako avè m paske m pa kwè moun ki pa dako avèm se enmi m. O fèt map bayo yon syèj bo tab la paske se sa lidè vanyan fè. "
Plis pase 75 milyon Ameriken deja vote nan eleksyon sa a. Se prèske mwatye total kantite moun ki te vote sa gen 4 an desa. Sondaj opinyon piblik yo montre kous la sere e ke gen 48 pousan elektè yo ki apiye Trump ak Harris.
