Venezyela
Gwo Tansyon Diplomatik ant Madrid ak Caracas
Gwo Tansyon diplomatik ant Madrid ak Caracas, ki jedi raple anbasadè li ann Espay pou konsiltasyon kèk èdtan apre prezidan gouvènman an, Pedro Sanchez, te resevwa opozan venezuelyen an Edmundo Gonzalez Urrutia, ki te pran azil nan Madrid depi dimanch.
An repons a yon deklarasyon ke Minis Defans Panyòl la, Margarita Robles te fè, kote li te dekri gouvènman Nicolas Maduro kòm yon "diktati", Venezyela "deside raple anbasadè Venezyelyen an" Gladys Gutierrez "pou konsiltasyon", dapre sa Minis Afè Etranjè Venezyelyen an. Yvan Gil te anonse sou rezo sosyo.
Caracas te konvoke tou anbasadè Espayòl la nan Venezyela, Ramon Santos Martinez, pou parèt nan Ministè a vandredi.
Jedi, Minis Defans Espayòl la, Margarita Robles, te eksprime solidarite ak "gason ak fanm nan Venezyela ki te oblije kite peyi yo" akòz "diktati".
Yon Kòmantè ke Mesye Gil te dekri kòm "ensolan ak grosye", li di ke pawòl piman bouk sa yo "temwaye yon deteryorasyon" nan relasyon bilateral 2 peyi yo.
Chèf gouvènman espayòl la Pedro Sanchez te resevwa Jedi Edmundo González Urrutia, kandida opozisyon an ki pèdi eleksyon an dapre rezilta ofisyèl yo men te kriye koken.
Rezilta ofisyèl yo di Maduro genyen eleksyon an sa pral fè twazyèm manda aktyèl prezidan an .
"Mwen byen akeyi li," se sa Mesye Sanchez te deklare, nan yon mesaj ke li pibliye sou X sou Mesye Gonzalez Urrutia ki te rive nan Madrid dimanch.
Misye Sanchez asire ke Espay kontinye "travay pou demokrasi, dyalòg ak dwa fondamantal pèp la nan Venezyela."
Espay, menm jan ak tout eta manm Inyon Ewopeyen an, ap mande piblikasyon rezilta chak grenn vòt ki te fèt nan biwo vòt yo.
Konsèy Elektoral Nasyonal la (CNE) pwoklame Prezidan Nicolas Maduro venkè eleksyon sa a, ak 52% vòt yo.
Men, opozisyon an konteste rezilta sa a ki asire, e yo fè konnen sou baz done yo genyen, ke kandida yo Edmundo Gonzalez Urrutia te jwenn plis pase 60% nan vòt yo.
Nan absans rezilta konplè, peyi Inyon Ewopeyen yo te refize rekonèt rezilta ofisyèl yo.
Etazini, ki deside rekonèt Misye Gonzalez Urrutia kòm prezidan eli, e anonse sanksyon jedi kont 16 moun ki pwòch Nicolas Maduro, ki fè konnen yo te "antrave" dewoulman eleksyon prezidansyèl la nan mwa Jiyè. 28.
Pami yo gen lidè CNE a ak majistra ki gen ladan prezidan Kou Siprèm lan ki valide re-eleksyon Mesye Maduro a, ak pwosekitè a ki te pibliye yon manda arestasyon kont kandida opozisyon an Edmundo Gonzalez Urrutia.
Caracas te rejte imedyatman "ak pi gwo detèminasyon" mezi yo te jije "ilejitim ak ilegal" epi konsidere kòm yon nouvo "agresyon" ke Washington te fè sou yo.
See all News Updates of the Day
Venezyela: Liberasyon Plis Pase 950 Prizonye Kriz Elektoral yo
Yon nouvo vag liberasyon prizonye ki te nan detansyon pandan ajitasyon apre reyeleksyon konteste Nicolas Maduro nan Venezyela te fè kantite total moun ki libere a rive 956, lajistis la te anonse nan Lendi, jis anvan Nwèl la.
Nan maten an, 177 liberasyon te apwouve anvan, epi 46 lòt nan apremidi a, ki totalize yon kantite "956 liberasyon ki te fèt" depi kriz apre eleksyon prezidansyèl Jiyè 28 a, pwokirè piblik la te deklare nan yon nòt pou laprès.
Vandredi, otorite yo te deja anonse 200, anplis de 179 yo te akòde menm semenn nan ak plis pase 300 yo deside depi Novanm.
Pami 956 prizonye ki lage sa yo genyen adolesan, men chif ofisyèl yo pa presize konbyen yo ye.
Fanmi ak pwòch prizonye yo te milite pandan plizyè semenn pou mande pou yo libere anvan Nwèl la.
Plis pase 2,400 moun yo te jwenn arestasyon yo pandan latwoublay apre reyeleksyon konteste Nicolas Maduro, yo te akize yo an patikilye de teworis ak ensitasyon layèn answit fèmen nan sant ki gen gwo sekirite.
Espay Ofri Ofisyèlman Azil Bay Opozan Venezelyen Edmundo González
Espay ofri ofisyèlman azil bay opozan venezelyen Edmundo González Urrutia, kandida ki te anfas Nicolas Maduro nan eleksyon prezidansyèl 28 jiyè a, se sa Minis Afè Etranjè José Manuel Albares te anonse vandredi.
"Demann azil Edmundo González te fè nan Espay la te aksepte, e yo pral notifye li nan jou kap vini yo," se sa ministè a te di bay jounalis yo nan Sena a, apre li te rankontre M. Urrutia nan maten an.
Yo te atann ak desizyon sa a, paske Premye Minis espanyòl Pedro Sánchez te asire depi nan kòmansman septanm, kèk jou apre opozan sa a te rive nan Espay, yo t ap ofri l azil kòm yon "jès imanitè".
Edmundo González te deklare sou X José Manuel Albares te konfime l pandan yo t ap pale "pozisyon Leta espanyòl" la se menm jan ak tout Inyon Ewopeyen an, "liberasyon tout prizonye politik yo e pou Venezyela respekte angajman dwa entènasyonal yo."
"Dokiman an," M. González raple, "presize Inyon Ewopeyen an pral mobilize tout zouti ki disponib pou soutni demokrasi ak yon tranzisyon pasifik ak enklizif nan Venezyela."
Edmundo González te kite peyi li pou Madrid 8 septanm, nan yon avyon militè espanyòl, apre li te chape poul li nan anbasad espanyòl nan Karakas.
Reyeleksyon Nicolas Maduro 28 jiyè a pou yon twazyèm manda sis lane te lakòz opozisyon an konteste ak tout fòs li, paske konsidere Edmundo González Urrutia te genyen avèk plis pase 67% nan vòt yo.
Pwoklamasyon viktwa li a te lakoz aksyon pwotestasyon ak konfwontasyon ak fòs lòd yo, ki te lakòz 28 moun mouri epi prèske 200 blese.
Edmundo González Urrutia te deklare plizyè fwa depi lè sa a li pral nan peyi l 10 janvye pou pran fonksyon prezidan.
Venezyela: Maduro Anonse li Vle Yon "Gwo Refòm Konstitisyonèl"
Prezidan venezyelyen an, Nicolas Maduro, anonse jedi 19 desanm lan li gen entansyon fé "yon gwo refòm konstitisyonèl" nan konstitisyon peyi a pandan twazyèm manda li a.
Nan yon diskou ofisyèl, Maduro te deklare: "Mwen te fòme yon ekip ak plizyè gwo konseye entènasyonal, gwo konseye nasyonal, pou reflechi, ak pèp nou an, sou yon gwo refòm konstitisyonèl ki plis demokratize sosyete Venezyelyen an epi bay plis pouvwa a sitwayen yo."
Nan peyi Venezyela, amannman konstitisyonèl yo dwe ratifye pa yon vòt popilè.
Nicolas Maduro te mande pou yo kreye yon asanble konstitiyan nan ane 2017 pou "pasifye" peyi a, ki te gen pakèt manifestasyon ki t ap mande l lage pyel sou pouvwa a.
Enstitisyon an te pran fen nan ane 2020 san yo pa t rive amande Konstitisyon an, ki te fèt nan ane 1999 e ki te sipò lidè sosyalis Hugo Chavez.
Anons Prezidan Maduro a rive 3 semèn anvan li prete sèman pou twazyèm manda 6 an li gen pou al fè a (2025-2031).
Venezyela: Liberasyon 300 Moun yo te Arete Pandan Vyolans Apre eleksyon yo
Gouvènman an te anonse Jedi a, plis pase 300 moun yo te arete pandan manifestasyon kont reyeleksyon prezidan Venezyelyen an Nicolas Maduro yo te libere.
An total, plis pase 2,400 moun te nan prizon kèk èdtan apre anons viktwa Prezidan Maduro a pandan manifestasyon kote 28 moun te mouri epi prèske 200 lòt te blese.
"Pandan 72 dènye èdtan yo (10, 11 ak 12 desanm), 103 liberasyon te fèt," Ministè Enteryè a te di yon nòt pou laprès.
ONG Foro Penal, ki okipe defans "prizonye politik yo", di AFP jiska prezan, 190 moun te libere: 165 nan kòmansman, apre sa 25 nan dezyèm faz sa a otorite yo mansyone, enkli minè.
Prizonye yo, ki gen ladan anviwon yon santèn adolesan, te akize pou "teworis" epi yo te mete yo nan prizon ki gen gwo sekirite. Anpil nan yo te nan prizon san manda. Gouvènman an te louvri mwayen kominikasyon ki pèmèt denonse yo.
Reyeleksyon Nicolas Maduro nan dat 28 jiyè, pou yon twazyèm manda 6 zan, te konteste anpil pa opozisyon an, ki estime kandida li a, Edmundo González Urrutia, te genyen ak plis pase 67% nan vòt yo.
Maduro di : Prezime Koudeta kont Lula se yon Atak 'Makab'
Prezime koudeta kont prezidan brezilyen an, Luiz Inacio Lula da Silva, se yon plan "vyolan" ak "makab" kont lidè a, tokay Venezyelyen ak alye sosyalis li a, Nicolas Maduro, deklare pandan yon pwogram televizyon.
Lapolis brezilyen te mande enkilpasyon ansyen Prezidan Jair Bolsonaro an koneksyon avèk yon "koudeta" swadizan ki te òganize an 2022 pou anpeche Lula pran pouvwa a.
"Lula se yon gan òm e sa li fè tout lavi li se goumen pou Brezil nan yon fason pasifik, politik ak elektoral. Donk, tout solidarite ak Prezidan Lula devan dekouvèt atak vyolan ak makab sa yo kont li."