Dapre sa AFP rapòte, li pa fin twò si ki sa ki te fèt pandan lannwit dimanch pou rive lendi nan pi gwo prizon an nan Repiblik Demokratik Kongo (RDC), nan Kinshasa, dapre sa rapò ofisyèl te anonse Madi.
Minis Enteryè a, Jacquemain Shabani, te deklare nan yon deklarasyon sou yon videyo pre-anrejistre ke yo te pataje ak laprès: " Bilan pwovizwa sou kantite moun ki mouri pou kounyea se 129 - pami yo gen 24 pa bal.
Mesye Shabani rapòte tou ke gen 59 lòt ki blese "gouvènman an pran swen ki apwopriye pou yo".
Prizon Makala, ki se pi gwo nan peyi Afrik Santral sa a, gen anpil prizonye ladan , li genyen dis fwa plis prizonye ke sa li ta sipoze genyen (ant 14,000 ak 15,000 prizonye) pase kapasite li, tay nòmal prizon an fèt pou (1,500 moun), dapre estatistik ofisyèl yo.
Vè 2 zè nan maten lendi, kout bal sonnen, daprè sa plizyè rezidan AFP te entèvyouwe te di . Yo te temwaye ke katouch yo te kontinye ap chante pandan plizyè èdtan.
Daddi Soso, yon elektrisyen nan karantèn li, te di ke li te wè machin fòs lòd yo tap transpòte kadav byen bone nan maten.
Minis Enteryè a, dekri ensidan an tankou yon "tantativ pou sove ki echwe”.
Lari ki mennen nan prizon an te fèmen nan Lendi e te gen anpil prezans ofisye lapolis ak sòlda Madi, dapre sa jounalis AFP te konstate.
Dapre plizyè temwen, kout zam tap chante ankò nan katye a madi maten.
