Mwayen Oryan
Medyatè Kap Negosye yon Seselfe pou Konfli Gaza a Fini Chita Tande yo
Medyatè kap travay sou yon seselfe pou konfli Gaza a deklare Vandredi chita tande yo tap fè pandan 2 jou fini e yo gen entansyon reprann yo nan vil Kèr an Ejipt semèn pwochèn pou jwenn yon antant pou sispann goumen.
Nan yon deklarasyon yo pibliye Vandredi, Etazini, Ejipt ak Katar deklare chita tande a te konstruktif epi dewoule nan yon anbyans pozitif.
Yo prezante plan yo bay tou le 2 pati yo ak espwa dèske yap kapab kontinye travay sou detay aplikasyon ako seselfe a nan jou kap vini yo.
See all News Updates of the Day
Gaza : Lame Izrayèl di li Frape Yon Bato Bò Kot Khan Younès
Lame peyi Izrayèl anonse lendi li te frape yon bato sispèk ki te toupre vil kotyè Khan Younès nan sid Gaza, paske selon li, batiman sa a te menase sekirite zòn nan.
Lame a deklare nan yon kominike : "Nou te frape pi bonè jodi lendi a yon bato-a-motè sispèk ki te toupre kòt nò Khan Younès, ki t ap vyole restriksyon sekirite yo epi ki te reprezante yon menas."
Lame a ajoute li te tire kout zam sou de sispèk ki t ap pwoche pre sòlda li yo nan sid Gaza.
Rubio Di Li Siyen Dokiman pou Voye $4 Milya Èd Militè Bay Izrayèl
Sekretè Deta Ameriken Marco Rubio te di Samdi 1 mas la li te siyen pou voye anviwon $4 milya èd militè bay Izrayèl la.
Nan yon deklarasyon tou kout, Rubio raple ke yon anbago pasyèl sou zam ansyen Prezidan Joe Biden te enpoze te leve.
"Mwen te siyen yon deklarasyon... pou akselere livrezon apeprè $4 milya èd militè bay Izrayèl " .
Bèlen Mande Izrayèl pou " Pwoteje Sivil yo " nan Sijòdani
Almay eksprime vandredi enkyetid li sou operasyon lame Izrayèl ap mennen nan twa kan refijye palestinyen nan nò Sijòdani, e li mande pou yo " pwoteje sivil yo pi byen " epi "garanti retou yo pi vit posib."
"Nou mande gouvènman Izrayelyen an pou l pi byen pwoteje sivil yo ak enfrastrikti sivil yo pandan operasyon militè a epi garanti retou 40,000 moun sa yo lakay yo pi vit posib," dapre sa Ministè Afè Etranjè Alman an ekri nan yon kominike.
Li konsidere tou kòm "inakseptab" pwojè pou lame Izrayèl rete "alontèm" nan kan Jènin.
Trèv nan Gaza : Netanyahu Mande Negosyatè li yo pou yo Ale Caire pou Diskisyon
Premye Minis Izrayèl la, Benjamin Netanyahu, mande jedi pou negosyatè izrayelyen yo ale nan vil Caire pou negosyasyon sou jan lagè nan Gaza a ka sispann, dapre sa biwo li fè konnen.
"Premye Minis Netanyahu mande delegasyon negosyatè yo pou yo vwayaje ale nan vil Caire jodi a (jedi) pou yo kontinye diskisyon yo," dapre sa biwo Premye Minis la deklare, san bay plis detay.
Izrayèl ak Hamas Dakò sou yon Nouvo Echanj, sa ki Kenbe Trèv Frajil la Entak
JERIZALÈM (AP) — Ofisyèl Izrayelyen ak Hamas yo di yo rive jwenn yon akò pou echanj kadav otaj ki mouri yo ak liberasyon plizyè santèn prizonye Palestinyen. Akò a, ki te fèt madi, kenbe trèv frajil la an plas pou omwen kèk lòt jou.
Izrayèl te retade liberasyon 600 prizonye Palestinyen depi samdi pou pwoteste kont sa li rele move tretman otaj yo pandan liberasyon yo.
Gwoup militan an di reta sa a se yon “vyolasyon grav” trèv la epi li deklare negosyasyon pou yon dezyèm faz pap posib jiskaske prizonye yo libere. Blokaj sa a te menase pou kraze trèv la.
Men, nan fen jounen madi a, Hamas te anonse li te rive jwenn yon akò pou debloke enpas la.