Sèjan Korbein Schultz, ki te gen pèmisyon pou l gade dokiman "Top Sekrè" Etazini, te jwenn arestasyon li nan mwa mas la nan Fort Campbell, yon baz militè ki sitye sou fwontyè eta Kentucky ak Tennessee.
Depatman Jistis la te di nan yon deklarasyon ke Schultz "plede koupab pou akizasyon konplo pou l jwenn ak divilge enfòmasyon sou defans nasyonal ameriken, ekspòte done teknik ki gen rapò ak defans ameriken, konplo pou ekspòte atik defans san lisans, aksyon li te fè pou li koronpi yon ofisyèl piblik."
Dapre dokiman legal yo, Schultz te pataje plizyè douzèn dokiman sansib militè ameriken ak yon moun k ap viv nan Hong Kong ke li te kwè ki asosye ak gouvènman Chinwa a.
Yo te peye li $42,000 pou enfòmasyon an, dapre Depatman Jistis la.
Pami dokiman Schultz te remèt, te gen youn sou leson Lame Ameriken te aprann pandan dewoulman lagè Ikrèn ak Larisi ke li ta aplike nan defans Taiwan.
Lòt dokiman ke li te pataje gen ladan tou taktik ak preparasyon militè Chinwa yo ak egzèsis fòs militè ameriken yo nan Kore di Sid ak Filipin .
Lòt dokiman yo enkli enfòmasyon ki gen rapò ak elikoptè HH-60, avyon de gè F-22A, avyon rekonesans U-2 ak sistèm misil yo.
Robert Wells, direktè adjwen Branch Sekirite Nasyonal FBI la di, "Gouvènman tankou Lachin ap vize pèsonèl militè nou yo ak enfòmasyon sekirite nasyonal nou yo e nou pral fè tout sa nou kapab pou asire ke enfòmasyon yo rete pwoteje kont gouvènman etranje ostil yo."
Schultz potansyèlman pral fas ak plizyè deseni nan prizon. Yo pwograme yon odyans pou kondanasyon li pou 23 janvye 2025.
Arestasyon Schultz te rive mwens pase yon ane apre arestasyon 2 maren Lamarin Amerike nan Kalifòni sou akizasyon espyonaj pou Lachin.
Ofisye Wenheng Zhao te jwenn kondanasyon 27 mwa nan prizon an janvye apre li te plede koupab de akizasyon yo te gen kont li yo.
Zhao ak yon lòt maren ameriken, Jinchao Wei, te jwenn arestasyon nan mwa Out.
