Mwayen Oryan
Plizyè Peyi Eksprime Kè Sote Dèske Asasina Lidè Hamas la Taka Deklanche yon Lagè Rejyonal
Lidè politik pi wo plase Hamas la mouri Mèkredi nan yon frap ayeryen ki dewoule anvan solèy la leve nan kapital Iranyèn nan, Teheran. Gwoup militan an konfime nouvèl la epi blame Izrayèl pou yon asasina ki choke anpil moun epi riske deklanche yon lagè total nan rejyon Mwayèn Oryan an.
Lidè siprèm Iranyen an sèmante pou l pran revanj kont Izrayèl pou zak sa a.
Nan peyi Izrayèl menm, Premye Minis Benjamin Netanyahu deklare Izrayèl pral "egzije nempot ki moun ki ta agrese peyi a peye yon pri lou" kèlkeswa kote atak la soti. Li di pèp Izrayelyen an "jou kap vini yo ap difisil.
Izrayèl te sèmante pou l touye Ismail Haniyeh ak lot lidè Hamas yo depi apre atak militan yo te lanse 7 Oktob kont Izrayèl ki te deklanche konfli Gaza a.
Frap ayeryen Mèkredi a dewoule yon ti tan apre Haniyeh te asiste envestiti nouvo prezidan Iranyen an nan Teheran, epi kèk hè d tan apre Izrayèl te sible yon komandan wo plase Hezbollah a ki se zanmi Iran, nan kapital Libanèz la Bewout.
Etazini di li pa gen enfomasyon sou atak la. Lloyd Austin se Sekretè Defans Etazini. Li pale ak jounalis yo depi Filipinn:
"M pa gen anyen pou nou sou sa. Nou li nouvel yo men m pa gen okenn lot enfomasyon pou ba nou."
Austin di li pa kwè yon lagè rejyonal inevitab e ke Etazini kontinye apiye Izrayèl nan moman tansyon yo ap ogmante. Li ajoute si yo atake Izrayèl, Etazini pral ede l defann tèt li.
Konseye Sekirite Lamezonblanch, John Kirby di jounalis yo li paka ni konfime ni verifye nouvel ki soti Iran. Li repete menm pawol ak Austin pa rapo ak si yon ogmantasyon nan konfli a inevitab. Li pat vle di non plis si Lamezonblanch mande Izrayel mete dlo nan diven li.
Asasina a soulve kritik bo kote LaRisi ak Lachin.
Dmitry Peskov se pot pawol prezidan Ris la, Vladimir Putin:
"Nou kondane atak ki te debouche sou lanmo Misye Haniyeh ak tout fos nou. Nou kwè zak konsa vize gate jefo pou tabli lapè nan rejyon an. Epitou sa ka destabilize yon sityasyon ki deja chaje tansyon."
Nan Nouyok, potpawol Sekretè Jeneral LONU an, Stephane Djarric ankouraje tout moun mete dlo nan diven yo.
" Sekretè jeneral la kwè atak nou wè nan Sid Bewout ak Teheran reprezante yon ogmantasyon danjre nan moman kote tout jefo yo ta dwe debouche sou yon seselfe nan Gaza, liberasyon otaj Izrayelyen yo, yon gwo ogmantasyon nan asistans imanitè pou Palestinyen Gaza yo epitou yon retou o kalm. Olye de sa nap gade jefo pou minnen objektif sa yo. "
Dapre nouvèl yo, Iran mande pou Konsèy Sekirite LONU an oganize yon rankont dijans apremidi a a 4h pou diskite sou frap ki touye lidè Hamas la.
Kek enfomasyon nan repotaj sa a soti nan Associated Press. Korespondan VOA nan LONU, Margaret Besheer ak nan Lamezonblanch, Patsy Widakuswara kontribye a repotaj sa a.
See all News Updates of the Day
Liban: 48 Moun Mouri nan Plizyè Atak Izrayelyen nan Lès la
Omwen 48 moun, ki gen ladan 2 timoun, te jwenn lanmò yo nan plizyè atak Izryaelyen nan lès peyi Liban, dapre yon rapò Ministè Sante Libanè a, ki bay lis bonbadman ki fèt sou plizyè lokalite nan pwovens Baalbeck, youn nan bastyon Hezbollah.
Ministè Sante a te site an patikilye yon "frap lènmi Izraelyen an" sou Al-Allaq ki te lakòz 10 moun mouri, yon lòt sou al-Hafir ki te li menm tou touye 10 moun ak yon bonbadman sou sektè Ram kote 9 moun te pèdi lavi yo.
Izrayèl Atake Iran, Liban ak Gaza Pandan Wikenn nan
Izrayèl ouvètman atak Iran ak yon vag avyon samdi pase a e kontinye ak atak li yo nan band Gaza ak nan Liban ki fè plizyè mò ak blese.
Konsèy Sekirite LONU Pral Diskite Atak Izrayèl Lanse Kont Iran
Konsèy Sekirite Nasyonzuni ap fè yon rankont dijans Lendi 28 Oktob pou diskite sou sityasyon an nan Mwayèn Oryan an apre atak reprezay Izrayèl lanse kont Iran.
Prezidan konsèy la, ki se reprezantan La Suis, deklare Iran mande pou yo fè rankont la ak apui Aljeri, Lachin ak Larisi.
Minis Afè Etranje Iranyen an, Abbas Araqchi deklare nan yon lèt li voye bay 15 manm konsèy la Samdi: "Aksyon rejim Izrayelyen an reprezante yon menas grav pou lapè ak sekirite entènasyonal e sa ka destabilize rejyon an pi plis.
Frap Izrayèl la bonè Samdi te gen ladann yon seri atak ayeryen ki te vize faktori Iranyen ki fabrike misil yo. Li vini kèk semèn apre Iran te lanse 200 misil balistik kont Izrayèl epi nan moman Izrayè
ap goumen ak militan Hamas ak Hezbollah ke Iran apiye nan Gaza ak Liban.
Lidè Siprèm Iran an, Ayatollah Ali Khamenei deklare frap Izrayelyen yo "pata dwe ni egzajere ni diminye". Men li pa mande kareman pou tire revanj. Sete premye atak Izrayèl lanse ouvètman kont enmi jire li.
Premye Minis Izrayelyen Benjamin Netanyahu te deklare Dimanch ke atak yo atenn objektif Izrayèl yo ki gen ladann bloke kapasite defans Iran ak kapasite li pou l pwodui misil.
Anvan rankont konsèy la Lendi, Irak te pote plent devan LONU pou Izrayèl. Li plenyen pou di eta Ebre a vyole espas ayeryen li pou atake Iran.
Yon potpawol gouvènman Irakyen an di lèt la kondane vyolasyon espas ayeryen ak souvrènte peyi Irak.
Afrik di Sid di li Soumèt "Prèv" Zak "Jenosid" Izrayèl Komèt Bay Tribinal Entènasyonal la
Lafrik di sid li soumèt dosye "prèv" "jenosid" ke li di ke Izrayèl komèt nan Gaza bay Tribinal Entènasyonal Jistis la (ICJ).
Se Prezidan Sid Afriken an Cyril Ramaphosa ki te anonse sa nan yon deklarasyon li te fè Lendi 28 oktòb 2024 la.
Dosye sa a "genyen prèv ki montre ke gouvènman Izrayelyen an te vyole Konvansyon Jenosid la," yon akizasyon ke Izrayèl bò kote pal demanti.
3 Jounalis Pèdi Lavi yo Nan Liban
Atak lame Izrayèl yo pa sispann touye epi blese moun nan peyi Liban ak nan Gaza, nan moman ke rankont yo ap miltipliye pou jwenn yon seselfe nan lagè a.
Facebook Forum