Mwayen Oryan
Plizyè Peyi Eksprime Kè Sote Dèske Asasina Lidè Hamas la Taka Deklanche yon Lagè Rejyonal
Lidè politik pi wo plase Hamas la mouri Mèkredi nan yon frap ayeryen ki dewoule anvan solèy la leve nan kapital Iranyèn nan, Teheran. Gwoup militan an konfime nouvèl la epi blame Izrayèl pou yon asasina ki choke anpil moun epi riske deklanche yon lagè total nan rejyon Mwayèn Oryan an.
Lidè siprèm Iranyen an sèmante pou l pran revanj kont Izrayèl pou zak sa a.
Nan peyi Izrayèl menm, Premye Minis Benjamin Netanyahu deklare Izrayèl pral "egzije nempot ki moun ki ta agrese peyi a peye yon pri lou" kèlkeswa kote atak la soti. Li di pèp Izrayelyen an "jou kap vini yo ap difisil.
Izrayèl te sèmante pou l touye Ismail Haniyeh ak lot lidè Hamas yo depi apre atak militan yo te lanse 7 Oktob kont Izrayèl ki te deklanche konfli Gaza a.
Frap ayeryen Mèkredi a dewoule yon ti tan apre Haniyeh te asiste envestiti nouvo prezidan Iranyen an nan Teheran, epi kèk hè d tan apre Izrayèl te sible yon komandan wo plase Hezbollah a ki se zanmi Iran, nan kapital Libanèz la Bewout.
Etazini di li pa gen enfomasyon sou atak la. Lloyd Austin se Sekretè Defans Etazini. Li pale ak jounalis yo depi Filipinn:
"M pa gen anyen pou nou sou sa. Nou li nouvel yo men m pa gen okenn lot enfomasyon pou ba nou."
Austin di li pa kwè yon lagè rejyonal inevitab e ke Etazini kontinye apiye Izrayèl nan moman tansyon yo ap ogmante. Li ajoute si yo atake Izrayèl, Etazini pral ede l defann tèt li.
Konseye Sekirite Lamezonblanch, John Kirby di jounalis yo li paka ni konfime ni verifye nouvel ki soti Iran. Li repete menm pawol ak Austin pa rapo ak si yon ogmantasyon nan konfli a inevitab. Li pat vle di non plis si Lamezonblanch mande Izrayel mete dlo nan diven li.
Asasina a soulve kritik bo kote LaRisi ak Lachin.
Dmitry Peskov se pot pawol prezidan Ris la, Vladimir Putin:
"Nou kondane atak ki te debouche sou lanmo Misye Haniyeh ak tout fos nou. Nou kwè zak konsa vize gate jefo pou tabli lapè nan rejyon an. Epitou sa ka destabilize yon sityasyon ki deja chaje tansyon."
Nan Nouyok, potpawol Sekretè Jeneral LONU an, Stephane Djarric ankouraje tout moun mete dlo nan diven yo.
" Sekretè jeneral la kwè atak nou wè nan Sid Bewout ak Teheran reprezante yon ogmantasyon danjre nan moman kote tout jefo yo ta dwe debouche sou yon seselfe nan Gaza, liberasyon otaj Izrayelyen yo, yon gwo ogmantasyon nan asistans imanitè pou Palestinyen Gaza yo epitou yon retou o kalm. Olye de sa nap gade jefo pou minnen objektif sa yo. "
Dapre nouvèl yo, Iran mande pou Konsèy Sekirite LONU an oganize yon rankont dijans apremidi a a 4h pou diskite sou frap ki touye lidè Hamas la.
Kek enfomasyon nan repotaj sa a soti nan Associated Press. Korespondan VOA nan LONU, Margaret Besheer ak nan Lamezonblanch, Patsy Widakuswara kontribye a repotaj sa a.
See all News Updates of the Day
Lufthansa Pwolonje Sispansyon Vòl li nan Mwayen Oryan
Gwoup Alman Lufthansa anonse Jedi ke li pwolonje sispansyon vòl li yo nan Tel Aviv ak Teheran jiska 24 septanm, jiska 26 oktòb pou Beyrouth, akòz tansyon ki gen nan rejyon an.
Nan yon deklarasyon Gwoup la te di "Akòz sitiyasyon aktyèl la, Lufthansa Group ap chanje yon lòt fwa ankò orè vòl li yo". Konpayi a, ki gen pi gwo gwoup avyon Ewòp la pibliye yon deklarasyon, apre li te repete orè vòl li yo nan rejyon an, tankou lòt konpayi avyon nan semèn ki sot pase yo te fè.
Yo Fouke yon Izrayelyen Ki Te Fè Pati Yon Konplo ak Iran pou Asasinen Netanyahu
Otorite an Izrayèl arete yon sitwayen ke yo akize te fè pati yon konplo ak Iran pou elimine Premye Minis Benjamin Netanyahu.
Otorite yo te anonse Jedi nouvèl sila, mwens pase 2 mwa apre yo te touye nan Teheran ansyen lidè Hamas la, Ismaïl Haniyeh, nan mitan lagè Gaza.
Lè sa a, Repiblik Islamik Iran te akize Izrayèl, li fè konnen se yo ki responsab aksyon sila, li te asasinen lidè mouvman islamis palestinyen an, epi lidè siprèm, Ayatollah Ali Khamenei, e li te imedyatman menase pou yo"tire revanj ". Jiskaprezan Izrayèl pa fè okenn kòmantè sou asasina sila.
Jedi, lapolis Izraelyen ak Shin Bet (entèlijans domestik) anonse ke yon ankèt yo te mennen mennen yo ak arestasyon yon biznisman Izraelyen ki te "rekrite pa sèvis entèlijans Iranyen yo" nan kad yon plan pou "asasine pèsonalite Izrayelyen" tankou Mesye Netanyahu, men tou Minis defans li a, Yoav Gallant, chèf Shin Bet la, Ronen Bar, ansyen Premye Minis Naftali Bennett ak lòt pèsonalite nan peyi a.
Dapre medya Izraelyen yo, sispèk la, ki nan detansyon depi 29 out, se yon jwif ki soti nan vil Ashkelon (sid), Mordechai Maman, li fèt an 1952.
Nonm yo arete a "antre nan kontrebann nan peyi Iran 2 fwa epi yo te peye l pou fè misyon" nan Izrayèl, dapre sa fòs lapolis la ak kò espesyalize ak Shin Bet fè remake nan yon deklarasyon ansanm, san yo pa presize idantite sispèk la.
Kominike pou laprès la presize ke sispèk la te "te viv nan peyi Latiki pou yon peryòd de tan ", ke li te gen lyen ak Latiki ak Iran ki te mete l 'nan kontak nan telefòn ak yon "biznisman rich (k ap viv) nan Iran ke yo te rele Eddie."
Li te antre an Iran an sekrè nan mwa me 2024 pou yon reyinyon fas a fas ak Eddie.
Lidè Hezbollah a di Atak Bipè a Depase Limit yo
Lidè Hezbollah a deklare seri atak ki sible aparèy kominikasyon gwoup la sete yon "gwo kou" ki travèse yon "liy wouj".
Hezbollah tire sou Izrayèl ak dron Jedi maten nan sak sanble yon siy gwoup la ap eseye jere atak li kont Izrayèl pandan konfli Izrayelo Hamas la. Hamas se yon alye Hezbollah a.
Nan yon operasyon ke anpil moun kwè sete travay Izrayèl, plizyè santèn bipè ak walkie-talkie ke Hezbollah a sèvi te sote. Omwens 32 moun mouri pami yo 2 timoun epi 3 mil lot blese.
Te Gen Plizye Eksplozyon Kote yo Tap Chante Fineray 3 Manm Hezbollah nan Liban
Plizyè eksplozyon sote Mèkredi nan lye kote yo tap chante fineray 3 manm Hezbollah ak yon timoun ki mouri nan eksplozyon "biper" ki te fèt Madi a, dapre sa jounalis Associated Press (AP) ki te sou plas rapòte.
Yon Nouvo Seri Eksplozyon Frape Liban
Plizyè eksplozyon sote Mèkredi nan lye kote yo tap chante fineray 3 manm Hezbollah ak yon timoun ki mouri nan eksplozyon "biper" ki te fèt Madi a, dapre sa jounalis Associated Press (AP) ki te sou plas rapòte.
Ministè sante Liban an di omwens yon moun mouri e plis pase 100 lòt blese Mèkredi nan eksplozyon aparèy elektwonik nan plizyè rejyon nan peyi a.
Yon responsab Hezbollah di AP ke "walkie-talkie" gwoup la eksploze e moun te ka tande bri eksplozyon an nan Beiwout.
Responsab la pale sou kondisyon pou non li pa site paske li pat gen otorizasyon pale ak laprès.
Sekrete d Eta Antony Blinken kap vizite Ejipt di Etazini pat o kouran atak la.
"Pa rapò ak Liban, Etazini pa te o kouran ensidan sa yo ni patisipe nan. Nap ranmase enfòmasyon toujou e an jeneral nou di kleman ke li enpòtan pou tout pati yo evite fe okenn bagay ki taka chofe konfli a pi plis alòske nap eseye rezoud konfli Gaza a."
Ajans nouvèl ofisyèl Liban an rapòte tou ke sistèm enèji solè yo te eksploze nan kay nan divès katye Beirout ak nan sid Liban.
Nouvo seri eksplozyon ki frape peyi a lakoz konfizyon ak kolè apre atak ak bonm "biper" yo ki sanble se yon atak konplike Izrayelyen ki vize manm Hezbollah yo.
Pòtpawòl Komisyon Dwa Moun Nasyonzuni, Ravina Shamdasani di atak nan Liban ak Siri yo chokan e ke enpak sou sivil yo pa akseptab.
"Fok gen yon anket endepandan, konplè e transparan sou sikonstans eksplozyon sa yo. Nou dwe trennen devan la jistis, moun ki òdone yo epi egzekite yo."
Eksplozyon yo dewoule yon jou apre sak te sanble yon atak Izrayelyen ki vize "biper" ke Hezbollah itilize. Omwens 12 moun mouri epi prèske 3 mil blese.
Pami viktim yo te gen 2 timoun. Nouvèl yo fè konnen bipè yo sote nan Liban epitou nan Siri.
Facebook Forum