Direktè Biwo Envestigasyon Federal (FBI), Christopher Wray, rapòte operasyon an pandan yon seyans depozisyon ke yon komisyon Chanm Depite ameriken an te gen sou rivalite estratejik ant Etazini ak Lachin.
FBI anonse operasyon an an menm tan ak Depatman Jistis la.
Nan mwa Me 2023, Etazini ak alye li yo nan loksidan lonje dwèt sou Volt Typhoon, ke yo dekri kòm yon gwoup "pirat entènèt" ke Lachin patwone pou enfiltre enfrastrikti enpòtan ameriken.
Direktè FBI la di, "Jis maten an, nou anonse yon operasyon kote nou menm ak patnè nou yo idantifye dè santèn routeurs (aparèy pou konksyon entènèt) ke Volt Typhoon te pirate".
Peken bò kote pa li rejte ak tout fòs tout akizasyon sa yo jedi.
Yon Pòtpawòl Ministè Afè Etranjè Chinwa a, Wang Wenbin, deklare nan yon konferans pou laprès "Etazini fè akizasyon sa yo san fondman epi li denigre Lachin san li pa bay okenn prèv."
Pòtpawòl la akize Etazini tou kòm « peyi ki fè plis atak sou entènèt » e kòm ekspè nan atak sa yo.
Direktè FBI la Wray kontinye poul di ke lojisyèl gwoup sa a itilize "te pèmèt Lachin enfiltre lakay nou e mennen aktivite rekonesans ak aktivite kont enfrastrikti enpòtan nan Etazini tankou kominikasyon, transpò, ak sektè dlo".
"Gwoup pirat Chinwa yo pran pozisyon nan enfrastrikti Ameriken pou yo fè gwo dezòd nan enfrastrikti sa yo ki ap sèvi sitwayen nan kominote nou yo."
Pirat sa yo ap fè preparasyon sa yo pou nenpòt lè Lachin ta vle "atake" Etazini, sa se avètisman direktè FBI la.
Matthew Olsen, ki se minis jistis adjwen ki responsab divizyon sekirite nasyonal la, di nan yon nòt pou laprès ke lè Repiblik Popilè Lachin nan ka antre nan enfrastrikti Etazini yo, li ta ka sèvi ak sa pou fè presyon si li ta nan yon kriz ak Etazini.
Operasyon FBI sa a te jwenn otorizasyon yon tribinal federal nan Texas, dapre Depatman Jistis la.
