Sa gen yon semèn depi pwokirè espesyal Jack Smith te pwopoze pou jijman ansyen prezidan Ameriken an kòmanse 2 janvye 2024, jijman ki, dapre estimasyon li "pa dwe dire plis pase 4 a 6 semèn".
Jij Tanya Chutkan fikse yon seyans 28 out pou detèmine dat pou kòmanse pwosè a, e li mande pou 2 pati yo fè pwopozisyon pa yo anvan li deside.
Avoka Donald Trump yo di Jedi nan pwopozisyon pa yo ke "Piblik la enterese nan yon jijman ki jis ak byen balanse, olye de yon jijman nan prese".
Yo plede pou di ke Avril 2026, kidonk nan plis pase 2 lane edmi, ap ba yo ase tan pou yo prepare yon defans ki jis pou kliyan yo a, e ki pa melanje ak lòt pwosè kont ansyen prezidan an.
Donald Trump, kap mennen kanpay nan kous eleksyon primè Repibliken pou eleksyon jeneral 2024 yo, gen 4 akizasyon penal kont li, 2 nan nivo federal, nan Washington ak Florid, ak 2 lòt nan nivo eta, nan New York ak Georgia.
