Depi madi 15 out 2023 a, plizyè milye rezidan kouri kite Kafou Fèy, ki vin tounen yon zòn stratejik ke gang yo ap chache kontwole.
Se gang ki gen nan tèt li Renel Destina (oswa Ti Lapli), ki ap mennen ofansiv sa a ki touye sivil piye ak boule kay nan Kafou Fèy.
Yo touye kèk nan viktim yo ak zam otomatik.
Rezo Nasyonal pou Defans Dwa Moun (RNDDH) fè yon evalyasyon sou vyolans la nan Kafou-Fèy, Pierre Espérance ki se direktè egzekitif RNDDH di AFP ke "Evalyasyon sa yo baze sou temwayaj paran ak fanmi viktim nou te rankontre yo".
Yon rezidan, Dominique Charles, di AFP li pèdi manman l, bòpè l, pitit gason l ki te gen 18 an, 2 sè ak 1 frè nan atak sa yo.
"Bandi yo atake kay nou an ak cocktèl Molotov. Mwen te reyisi chape men lòt manm fanmi yo pa t gen chans sa".
Depi kòmansman semèn nan, vyolans sa a lakòz plis pase 5,000 kouri kite kay yo daprè Jerry Chandler ki se direktè jeneral Pwoteksyon Sivil.
Yo kite katye yo a pye, sou motosiklèt oswa anpile nan machin, kèk nan yo eseye sove ak kèk bagay pèsonèl, yon valiz sou tèt yo oswa matla sou do machin. Pami yo, "fanm, timoun, granmoun aje", dapre Jerry Chandler.
Plizyè milye moun ki kouri kite kay yo al pran refij nan lekòl oswa nan sant espò, e gen lòt ki rete nan lari a.
Otorite yo anonse Jedi ke yo te kòmanse distribye plat manje ak dlo potab bay viktim yo.
Ayiti bloke depi plizyè ane nan yon gwo kriz ekonomik, pwoblèm sekirite ak politik, ki ouvè plis wout pou gang yo.
Gang ame sa yo kontwole anviwon 80% kapital Ayiti a e anpil fwa krim yo vyolan.
