Andriy Yermak, ki se chef pèsonèl Prezidan Ikrèn Volodymyr Zelenskyy, di sou Telegram ke atak la te vize pò Reni sou Flèv Danub la.
Gouvènè Odesa, Oleh Kiper, di sou Telegram ke atak la donmaje kèk depo, antwòt sa yo ki konsève sereyal nan yon pò arebò Flèv Danub la.
Yon lòt kote, fòs Ikrèn yo di yo repran kominote Urozhaine nan rejyon Donetsk, dapre Vis-Minis Defans Hanna Maliar.
Ministè defans LaRisi di mèkredi fòs defans anti-aeryen li detwi 3 dronn Ikrèn sou rejyon Kaluga.
Ministè ris la ajoute ke atak la ki fèt bonè maten an pa lakoz okenn blese ni fè okenn dega nan enfrastrikti.
Nan Ikrèn toujou, bato Joseph Schulte ki gen drapo Hong Kong kite pò Odesa mèkredi. Vis-premye-minis Ikrèn Oleksandr Kubrakov di se premye bato ki pase nan yon koulwa tanporè nan Lanmè Nwa a, ke Ikrèn te tabli pou bato sivil apre LaRisi te rale soti nan Akò Sereyal Lanmè Nwa a.
Joseph Schulte t ap transpòte 30-mil tòn metrik kago, dapre Kubrakov. Li te bloke nan Odesa depi LaRisi te lanse envazyon li nan Ikrèn an Fevriye 2022.
