Human Rights Watch di nempòt ki asistans sekiritè pou Ayiti dwe gen ladann mezi pou anpeche abi.
Oganizasyon dwa moun nan fè deklarasyon sa a nan moman deba ap entansifye sou òf Kenya fè pou dirije yon fòs miltinasyonal pou ede Ayiti jere zak vyolans gang yo.
Gouvènman Ayisyen an, ki pa eli, te mande asistans dijans nan mwad Oktòb ane pase a, pandan ke gang yo tap etann kontwòl yo sou teritwa nasyonal la epi rann pi grav kriz imanitè nan peyi a. Gen plis pase 200,000 moun ki oblije kouri kite kay yo.
Okenn peyi pat volontye pou dirije fòs miltinasyonal la akoz yo pat vle apiye yon gouvènman Ayisyen ke anpil moun konsidere tankou koronpi. Sepandan nan mwad Jiyè a, Kenya te di li dakò pou l dirije fòs la.
LONU gen pou l pibliye yon rapò semèn sa a, epi apre sa plan an, ki gen sipò Etazini pral pase devan Konsèy Sekirite LONU pou vote sou li.
Yon rapo HRW pibliye Lendi di li entèvyouwe 127 moun an Ayiti. Anpil nan moun sa yo rapòte zak vyolans seksyèl ap komèt tout tan, e ke yo pa gen aksè ak pwodui premye nesesite yo.
Yon manman pitit ki rele Rosie di chèchè HRW yo "mwen vle pou kominote entènasyonal la vinn tabli lapè si yo kapab. Pa gen dlo pa gen elektrisite, pa gen manje e pa gen lapè."
Chèchè yo fè remake pi fò Ayisyen yo entèvyouwe apiye lide pou yon fòs entènasyonal vinn ede lapolis men ke fòk gen mezi an plas pou sofgade yo.
Pa egzanp yo mande pou LONU fè konsta sityasyon an yon fwa pa mwa, epi pou mete an plas ajans endepandan ki ta veye abi epi mennen ankèt si nesesè.
HRW lanse apèl bay Repiblik Dominikèn ak Etazini pou yo sispann depòte migran an Ayiti.
