Sou-sekretè Deta pou Zafè Politik Victoria Nuland di sou platfòm medya sosyal X, ki te rele Twitter, ke li te vwayaje nan kapital la Niamey "pou eksprime gwo enkyetid li devan efò pou sezi pouvwa yon jan ki pa demokratik, e li te ekzòte panzouyis yo pou yo retounen anba lòd konstitisyon an."
Nuland di jounalis yo nan yon konferans pou laprès nan telefonn lendi ke li te rankontre ak ofisye ki "pwoklame tèt li chef defans la", an palan Brigadye Jeneral Moussa Salaou Barmou ak 3 lòt otorite militè pandan vizit li a, e li dekri chita-koze yo kòmkwa yo "ektrèmman sensè pafwa, men vrèman difisil."
Nan yon entèvyou ak Radio France Internationale lendi, Sekretè Deta Blinken di se "yon solisyon diplomatik ki ta pi bon nan sityasyon an."
Li di ke dirijan militè yo "kanpe fèm sou pozisyon yo" ki pa nan konstitisyon an. Li ajoute ke panzouyis yo pa te kite li pale ak Prezidan depoze Mohamed Bazoum ak fanmi li, ni ak lidè kou deta a Jeneral Abdourahamane Tchiani.
Nuland te al pote mesaj Sekretè Deta Anthony Blinken ki di Washington ap koupe èd ekonomik ak lòt jan de sipò pou Nijè "si demokrasi pa retounen nan peyi a."
